Marcos Llorente ka bërë të ditur se nuk do të luajë më për ekipin kombëtar të Spanjës, duke e përfunduar përfaqësimin ndërkombëtar në moshën 31-vjeçare.
Mesfushori i Atletico Madridit tha se vendimi është marrë prej tij me vetëdije të plotë. Edhe pse e pranon se është ende relativisht i ri, Llorente beson se tani është koha e duhur për t’u tërhequr nga angazhimet me kombëtaren.
Të lidhura
None found
“Kam vendosur t’i jap fund kohës sime me ekipin kombëtar spanjoll, pavarësisht se jam i vetëdijshëm se jam ende i ri”, u shpreh fillimisht ai.
Lojtari 31-vjeçar nënvizoi se bëhet fjalë për një zgjedhje personale, të cilën e ka analizuar gjatë dhe me shumë kujdes përpara se ta zyrtarizonte.
“Është një vendim personal, për të cilin e kam menduar me shumë kujdes dhe, mbi të gjitha, një vendim që vjen nga zemra”, deklaroi Llorente.
Gjatë mesazhit të tij, ai shprehu edhe falënderimin për privilegjin që pati për të përfaqësuar Spanjën përgjatë karrierës së tij ndërkombëtare.
“Ka qenë një nder të përfaqësoj vendin tim”, përfundoi futbollisti i gjithanshëm i Atletico Madridit.
