Një ngjarje e rëndë ka ndodhur mbrëmjen e djeshme në zonën e Gjoricës, Bulqizë, ku pesë anëtarë të një familjeje u përfshinë nga ujërat e lumit Drin teksa po laheshin. Dyshimet kryesore janë për mbytjen e një minoreneje rreth 7-vjeçare.
Të lidhura
None found
Sipas informacioneve nga autoritetet policore të Bulqizës, situata u përkeqësua papritur pasi niveli i ujit në lumë u rrit ndjeshëm. Kjo erdhi si pasojë e lëshimit të ujit nga digat e hidrocentralit në zonën e Dibrës së Madhe, duke bërë që rryma të rrëmbejë larësit.
Të afërmit e personave të përfshirë lajmëruan Policinë rreth orës 21:00. Forcat e rendit arritën me shpejtësi në vendin e ngjarjes dhe, pas një operacioni intensiv që zgjati afërsisht katër orë, ia dolën të nxjerrin të gjallë katër prej tyre.
Ndërkohë, ekipet e shpëtimit po vazhdojnë pa ndërprerë punën për të lokalizuar fëmijën e mitur, rreth 7 vjeç, i cili mendohet se është marrë nga forca e rrjedhës së ujit dhe rezulton i zhdukur.
