Ministri i Drejtësisë, Jeton Shasivari, njoftoi se së shpejti do të zhvillojë një takim me studentët dhe dekanët e fakulteteve juridike, përpara se të formalizohet zgjidhja përfundimtare për provimin e jurisprudencës. Në një prononcim për Alsat, ai tha se propozimi mbetet ai i bërë publik më herët, ndërsa bëri të ditur se në Ministri janë paraqitur kërkesa që provimi, përveç gjuhës shqipe, të mund të zhvillohet edhe në anglisht dhe turqisht.
Të lidhura
None found
Sipas Shasivarit, pritet edhe kërkesa nga Universiteti Shtetëror i Tetovës, universiteti i parë me mësim në gjuhën shqipe. Pas kësaj, Ministria do të organizojë një takim konsultues dhe informues me përfaqësuesit e organizatave studentore dhe dekanët e fakulteteve juridike.
“Presim edhe kërkesën e universitetit të parë me mësim në gjuhën shqipe, pra Universiteti Shtetëror i Tetovës dhe në periudhën që vjen do të organizojmë këtë takim konsultativ, informues me përfaqësues të asociacioneve studentore dhe dekanëve të fakulteteve juridike. Ky dialog është shumë i rëndësishëm edhe për ta adresuar edhe çështjet praktike për organizimin e provimit të jurisprudencës në disa gjuhë. Pra çështja e materialeve të provimit, literaturës juridike, dispozitave juridike, pyetjeve të provimit, çështja e kritereve profesionale të vlerësimit, çështja e përkthimit”, tha ministri Shasivari për Alsat.
Ministri synon t’i bindë studentët se propozimi përbën një përparim, edhe pse ata e kanë kundërshtuar atë për shkak se teoria parashikohet të zhvillohet në gjuhën amtare, ndërsa pjesa praktike në gjuhën maqedonase.
”Jam i bindur se me një sqarim edhe profesional edhe institucional, studentët, kandidatët e ardhshëm do ta kenë të qartë se bëhet fjalë për një avancim dhe për një qasje gjithëpërfshirëse”, shtoi Shasivari.
Duke iu përgjigjur kërkesës së studentëve që çështja të rregullohet vetëm me një vendim, pa ndryshime ligjore, Shasivari tha se nuk duhen bërë eksperimente. Ai këmbënguli se zgjidhja duhet të jetë e qëndrueshme dhe afatgjatë, duke theksuar se provimi i jurisprudencës do të zhvillohet pa pengesa gjuhësore.
“Qasja jonë është qasje afatgjate, ne nuk e zvarrisim procesin, por ne e kemi ndërtuar një zgjidhje e cila është e qëndrueshme, është në pajtim me Kushtetutën, ligjet në fuqi dhe me standardet ndërkombëtare”, deklaroi Shasivari.
Ndërkohë, përfaqësuesit e iniciativës studentore deklaruan dje për Alsat se qëndrimi i tyre mbetet i pandryshuar: provimi i jurisprudencës duhet të mbahet në gjuhën shqipe si në pjesën teorike, ashtu edhe në atë praktike. Ata paralajmëruan se protestat do të vazhdojnë nëse kërkesat e tyre nuk përmbushen. /Alsat/
