Dimitar Apasiev, udhëheqësi i partisë opozitare maqedonase Levica, ka shprehur zemërim të fortë kundrejt VMRO-DPMNE-së, pas prezantimit të faqes dygjuhësore në Ministrinë e Drejtësisë, institucion që drejtohet nga Jeton Shasivari, pjesë e koalicionit VLEN.
Të lidhura
None found
Në një reagim të publikuar në platformat sociale, Apasiev përdori tone sarkastike ndaj motos së VMRO-DPMNE-së, duke theksuar: “Si ishte ajo fraza: ‘Maqedonia sërish KRENARE’? A ndiheni krenarë tani, përkrahës të VMRO-së?” Ky koment u plotësua me etiketat #VmroNevermore, #Neobalizëm dhe #DygjuhësiIlegale.
Ky qëndrim i ashpër i kreut të Levicës erdhi si pasojë e vendimit të ministrit Jeton Shasivari për të vënë në funksionim uebsajtin zyrtar edhe në gjuhën shqipe, hap ky që përputhet me Ligjin për Përdorimin e Gjuhëve.
Me anë të këtij mesazhi, Apasiev shënjestron VMRO-DPMNE-në, duke e implikuar se, pavarësisht qëndrimit të mëparshëm kundërshtar ndaj dygjuhësisë, tani nën administrimin e saj po avancohet përdorimi i shqipes në organet shtetërore.
