Për të lehtësuar barrën e rritjes së çmimeve të karburanteve, ekzekutivi italian ka miratuar një dekret që ul përkohësisht me 17 centë për litër taksën që aplikohet mbi naftën.
Të lidhura
None found
Kjo ndërhyrje do të qëndrojë në fuqi minimalisht deri më datën 6 gusht. Ministri i Ekonomisë, Giancarlo Giorgetti, njoftoi se më 4 gusht kabineti qeveritar do të analizojë ecurinë për të shqyrtuar ndërhyrje të tjera potenciale, duke mos përjashtuar mundësinë e një ndërhyrjeje për të vënë fre edhe në faturat e energjisë elektrike dhe gazit.
“Do të shohim si do të ecë situata,” u shpreh Giorgetti. Nga ana e saj, kryeministrja Giorgia Meloni e cilësoi si të drejtë reagimin përballë shtrenjtimit, duke theksuar se “nuk është një situatë që e kemi krijuar ne, por që jemi të detyruar ta përballojmë”.
Sipas Melonit, rritja e çmimit të naftës godet në mënyrë të veçantë degë si transportet dhe bujqësia, çka në analizë të fundit përkthehet në një kosto shtesë për xhepin e çdo familjeje.
Meloni: Kjo nuk është zgjidhja përfundimtare
“Jemi të ndërgjegjshëm se kjo masë nuk e zgjidh problemin në rrënjë,” pranoi Meloni. “Megjithatë, ajo përbën një përgjigje të shpejtë dhe të matur, duke pasur parasysh hapësirat e kufizuara financiare dhe një kontekst ndërkombëtar në lëvizje të vazhdueshme.”
Edhe Berlini zyrtar kishte ndërmarrë një hap të ngjashëm në fillim të këtij viti, kur parlamenti gjerman votoi një shkurtim të përkohshëm të barrës fiskale për naftën dhe derivatet e saj, përfshirë benzinën. Megjithatë, ajo masë përfundoi në fund të qershorit, pak çaste përpara se tensionet mes Shteteve të Bashkuara dhe Iranit të përshkallëzoheshin sërish, dhe gjatë këtij muaji çmimet kanë shënuar një tjetër ngritje të fortë. /DW
