Përfaqësuesi diplomatik i Gjermanisë në Kosovë, Reiner Rudolph, ka apeluar për ngritjen pa vonesë të institucioneve të reja shtetërore, duke theksuar se ky veprim është jetik për stabilitetin politik, funksionimin normal të shtetit dhe përparimin e proceseve kyçe institucionale.
Të lidhura
None found
Gjatë një interviste, Rudolph nënvizoi rëndësinë që Kosova të japë një sinjal të fuqishëm dhe të padiskutueshëm rreth asaj se cili do ta drejtojë ekzekutivin në katër vitet e ardhshme. Sipas tij, paqartësia politike dhe mungesa e institucioneve legjitime cenojnë besimin e qytetarëve, aleatëve ndërkombëtarë dhe investitorëve në qëndrueshmërinë e vendit.
“Besoj se tani është e domosdoshme një sinjal nga Kosova lidhur me atë se kush do t’i ndërtojë institucionet për katër vitet e ardhshme. Jam në dijeni se diskutimet dhe procedurat janë duke u zhvilluar, por mendoj sinqerisht se do të ishte pozitive t’i kishim institucionet sa më shpejt dhe të mos kalojmë në një fazë tjetër pasigurie,” deklaroi ambasadori gjerman.
Ai shtoi se megjithëse bisedimet për themelimin e institucioneve janë ende në ecuri, është e rëndësishme që ato të përfundohen sa më parë. Rudolph paralajmëroi se zgjatja e kësaj periudhe mund të sjellë paqëndrueshmëri të panevojshme politike dhe të frenojë vendimmarrjen për çështje me interes madhor shtetëror.
Diplomati gjerman vuri në dukje se krijimi i shpejtë i institucioneve do t’i hapte rrugë Kosovës që të fokusohej te prioritetet kryesore, si reformat, zhvillimi ekonomik dhe partneriteti ndërkombëtar. Ai ripohoi se qëndrueshmëria institucionale është një kusht thelbësor për avancimin e vendit dhe përballimin me efikasitet të sfidave që vijnë në vitet në vazhdim.
Zogaj: Gjermania prej kohësh po e paralajmëron Kosovën që të çlirohet nga ky bllokim institucional
Rreth kësaj çështjeje, në një deklaratë për “Bota sot”, ka folur publicisti Skënder Zogaj.
Ai thekson se vonesa në krijimin e institucioneve po i shkakton dëme serioze shtetit, po rrezikon lidhjet me aleatët strategjikë dhe po frenon integrimin e vendit, prandaj spektri politik duhet të reagojë pa humbur kohë.
“Deklarata e ambasadorit Rudolph mbi nevojën urgjente për vënien në funksion të institucioneve të reja duhet parë si një paralajmërim i fortë. Ajo nuk përbën thjesht një rekomandim diplomatik, por një tregues të qartë se zvarritja e procesit po e dëmton rëndë shtetin e Kosovës.
Është absurde që një shtet me sfida kaq të mëdha të qëndrojë pa institucione që punojnë. Kosova asnjëherë nuk e ka pasur këtë luks, qoftë edhe për një ditë të vetme, e lëre më për muaj të tërë. Aktualisht, Kosova ndodhet përballë rreziqesh në shumë fusha, por më shqetësuese është ftohja e marrëdhënieve me partnerët strategjikë, kontributi i të cilëve ishte vendimtar për çlirimin dhe lirinë. Ngritja dhe forcimi i shtetit është detyrë e vetë kosovarëve dhe çdo vonesë në proceset demokratike e në rrugën evropiane ia dobëson pozicionin ndërkombëtar vendit. Pa institucione që funksionojnë, Kosova nuk mund të jetë pjesë integrale e arkitekturës së sigurisë rajonale dhe evropiane,” u shpreh ai.
Më tej, publicisti shton se apelet e përsëritura të partnerëve ndërkombëtarë, veçanërisht të Gjermanisë, për formimin e shpejtë të institucioneve nuk duhen anashkaluar, pasi çdo vonesë e minon pozitën ndërkombëtare të Kosovës dhe e ndërlikon rrugën drejt integrimit euroatlantik.
“Pikërisht për këtë, diplomatët e vendeve mike po përsërisin vazhdimisht të njëjtin apel: Kosova duhet t’i krijojë pa vonesë institucionet e saj. Çdo ditë e humbur gjeneron pasoja politike, diplomatike dhe strategjike.
Gjermania prej kohësh po e paralajmëron Kosovën që të dalë nga ky ngërç institucional. Do të ishte e pafalshme që këto mesazhe të injoroheshin. Ora nuk punon në favor të Kosovës dhe çdo vonesë e bën më të vështirë rikthimin e besimit dhe përshpejtimin e rrugëtimit euroatlantik,” deklaroi publicisti Zogaj për “Bota sot”.
Gashi: Kosova duhet të përveshë më në fund mëngët dhe të ndërtojë institucione të qëndrueshme
Ndërkohë, eksperti i çështjeve politike Eduard Gashi, në një bisedë me “Bota sot”, vlerësoi se paralajmërimi i ambasadorit gjerman duhet marrë si një sinjal i rëndë diplomatik, pasi bllokimi institucional po e dobëson pozicionin ndërkombëtar të Kosovës, ndërsa klasa politike po i jep përparësi interesave partiake mbi ato shtetërore.
“Ambasadori i nderuar i Gjermanisë e vëren me të drejtë shqetësimin për ecurinë e ngjarjeve në Kosovë. Fjala e tij nuk është thjesht një thirrje për themelimin e institucioneve, por një sinjal diplomatik. Në diplomaci, veçanërisht kur vjen nga një shtet si Gjermania, fjalët peshohen me kujdes dhe nuk shqiptohen rastësisht.
Bllokada e zgjatur institucionale po i dëmton rëndë marrëdhëniet e Kosovës me partnerët ndërkombëtarë. Kosova ka përfaqësi diplomatike në shumë shtete të botës, ku kryhet një punë e rëndësishme dhe ndërtohen kontakte me vendet mike. Megjithatë, kjo punë duhet të vijohet dhe të finalizohet nga institucionet funksionale dhe legjitime në Prishtinë. Nëse këto nuk funksionojnë, edhe diplomacia më e mirë e humb fuqinë e saj.
Fatkeqësisht, sot shumë aktorë politikë janë më të fokusuar në ruajtjen ose rritjen e pushtetit të tyre sesa në interesin shtetëror. Harrojnë që politika nuk ekziston për t’u shërbyer partive, por për të çuar shtetin përpara dhe për të përmirësuar jetën e qytetarëve,” u shpreh ai.
Eksperti politik më tej argumenton se bllokada e tejzgjatur institucionale po e zvogëlon besueshmërinë dhe peshën ndërkombëtare të Kosovës, në një periudhë kur partnerët perëndimorë kërkojnë shtete funksionale, duke rrezikuar pasoja politike, ekonomike dhe në procesin e integrimit evropian.
“Sot Kosova gjendet në një realitet gjeopolitik krejt tjetër nga ai i viteve të para të pavarësisë. Evropa po përjeton ndryshime të mëdha sigurie dhe partnerët perëndimorë kërkojnë shtete të besueshme, të parashikueshme dhe funksionale. Askush nuk kërkon përsosmëri, por të gjithë presin institucione që marrin vendime dhe i zbatojnë ato.
Natyrisht që kjo periudhë e gjatë e bllokimit institucional do të ketë pasoja. Asnjë shtet nuk mund ta përballojë pafundësisht mungesën e funksionimit normal të institucioneve. Kjo nuk është çështje partie, por tregues i pjekurisë politike të shtetit. Në politikën ndërkombëtare nuk vlejnë justifikimet dhe fajësimet. Ajo që çmohet janë rezultatet. Arsyetimet mund ta zënë kohën, por vetëm rezultatet ndërtojnë besimin.
Pikërisht për këtë arsye, Kosova rrezikon të humbasë peshë politike dhe besueshmëri ndërkombëtare. Në diplomaci, besimi është kapital. Një shtet që për një kohë të gjatë nuk arrin të marrë vendime strategjike fillon të perceptohet jo si pjesë e zgjidhjes, por si pjesë e problemit.
Edhe më e dhimbshme është krahasimi me të shkuarën. Pati një kohë kur udhëheqësit e Kosovës mirëpriteshin në Shtëpinë e Bardhë, zhvillonin takime të nivelit të lartë në kryeqytetet evropiane dhe Kosova ishte një nga prioritetet e politikës perëndimore. Sot shohim më së shumti fotografi simbolike me shtrëngime duarsh, ndërsa ndikimi real politik i Kosovës në arenën ndërkombëtare është tkurrur dukshëm.
Kjo do t’i kushtojë Kosovës politikisht, ekonomikisht dhe në procesin e integrimit evropian. Retorika populiste nuk do ta ndryshojë këtë realitet,” shpjegoi Gashi.
Publicisti në fund nënvizon se të gjitha forcat politike mbajnë përgjegjësi për të krijuar institucione funksionale përmes dialogut dhe kompromisit, sepse vetëm një Kosovë stabile, serioze dhe e besueshme mund ta ruajë mbështetjen e aleatëve dhe ta forcojë pozicionin e saj ndërkombëtar.
“Edhe thirrja për respektimin e vullnetit të qytetarëve nuk mjafton. Demokracia nuk përfshin vetëm fitoren në zgjedhje. Demokracia nënkupton gjithashtu aftësinë për të ndërtuar institucione funksionale, për të arritur kompromise dhe për të marrë përgjegjësi për shtetin. Mekanizmat demokratikë janë projektuar për të siguruar stabilitet institucional, jo për të prodhuar bllokada të pafundme.
Përgjegjësi kanë të gjitha forcat politike. Fituesi i zgjedhjeve ka një mandat demokratik më të fuqishëm, por pikërisht për këtë arsye mban edhe përgjegjësinë më të madhe. Lideri i vërtetë nuk matet me kokëfortësinë ideologjike, por me aftësinë për të krijuar shumica, për të ndërtuar ura bashkëpunimi dhe për të gjetur zgjidhje. Në të njëjtën kohë, edhe opozita ka detyrime ndaj shtetit dhe nuk duhet ta kthejë mosmarrëveshjen politike në paralizë institucionale.
Kosova nuk duhet të bjerë në iluzionin se mbështetja e aleatëve është e përjetshme. Në marrëdhëniet ndërkombëtare, miqësitë ngrihen mbi vlera të përbashkëta, por edhe mbi interesa të përbashkëta. Mbështetja nuk është një çek i bardhë; ajo fitohet vazhdimisht përmes seriozitetit, stabilitetit dhe besueshmërisë.
Prandaj, Kosova duhet të përveshë më në fund mëngët, të krijojë institucione stabile, t’i mbajë ato funksionale dhe të ecë përpara me punë konkrete e rezultate. Në një botë që ndryshon me shpejtësi, një shtet që qëndron në vend nuk mbetet aty ku është – ai mbetet prapa. Vetëm duke qenë një shtet funksional, serioz dhe i besueshëm, Kosova mund ta rifitojë peshën e saj ndërkombëtare dhe respektin e partnerëve strategjikë,” përfundoi eksperti i çështjeve politike, Eduard Gashi për “Bota sot”.
