Nelson Semedo, mbrojtësi i Portugalisë, ka bërë të ditur se Cristiano Ronaldo u tha bashkëlojtarëve në zhveshtore se Kupa e Botës 2026 ishte paraqitja e tij e fundit me fanellën e kombëtares në një Botëror.
Të lidhura
None found
Pasi Portugalia u mposht 1-0 nga Spanja në fazën e 1/8 së finales, Ronaldo iu drejtua skuadrës me një fjalim, ku njoftoi se nuk do të marrë më pjesë në një Kupë Bote si lojtar.
“Cristiano Ronaldo foli me skuadrën në fund dhe gjithçka që mund të bëjmë është ta falënderojmë. Ai konfirmoi se ky ishte Botërori i tij i fundit”.
Semedo vlerësoi figurën e Ronaldos, duke theksuar rëndësinë e tij për vendin dhe përfaqësuesen portugeze.
“Ai është një shtyllë për vendin, për Portugalinë dhe pas disa vitesh do të kem fatin t’u tregoj nipërve të mi se kam luajtur me të në kombëtare”.
Futbollisti portugez pranoi gjithashtu se eliminimi ishte një goditje e rëndë për ekipin, pasi synimi i tyre ishte të avanconin më tej në turne.
“Sigurisht që jemi të zhgënjyer. Donim ta kalonim këtë fazë dhe të shkonim sa më larg në këtë Kupë Bote. Fatkeqësisht, nuk ia dolëm”.
Në përfundim, Semedo tha se skuadra nuk arriti të shfaqte në fushë nivelin e saj të vërtetë.
“Ndonjëherë ndeshjet nuk shkojnë ashtu siç dëshiron dhe ne nuk arritëm ta tregonim cilësinë tonë në fushë”, përfundoi Semedo.
Megjithatë, mbetet ende e paqartë nëse Ronaldo do t’i japë fund përfundimisht karrierës me Portugalinë, pasi ai e ka lënë të hapur mundësinë për të vazhduar të luajë.//
