Mëngjesin e kësaj të mërkure, Forcat e Ndërhyrjes së Shpejtë (FNSH) zbarkuan në Krujë për kontrolle, pasi dyshohej se në fshatra kishte parcela me drogë.
Pas kontrolleve, policia ka arrestuar 2 shtetas, njëri prej tyre i shpallur në kërkim po për kultivim të bimëve narkotike.
Efektivet e Policisë kanë konstatuar këtë shtetas duke hapur 50 gropa si ato që përdoren për kultivimin e bimëve narkotike canabis sativa. Gjithashtu në banesën e njërit prej të arrestuarve janë gjetur të kultivuara disa bimë kanabisi, të cilat u sekuestruan në cilësinë e provës materiale.
Njoftimi i policisë:
Krujë
Vijojnë kontrollet nga Policia e Krujës, në zbatim të planit të masave për parandalimin dhe goditjen e tentativës për kultivim të bimëve narkotike.
Parandalohen dhe goditen dy raste të tentativës për kultivim të bimëve narkotike.
Vihen në pranga 2 shtetas, njëri prej tyre i shpallur në kërkim po për kultivim të bimëve narkotike.
Shërbimet e Komisariatit të Policisë Krujë, në zbatim të planit të masave për goditjen e veprimtarisë kriminale në fushën e narkotikëve, si rezultat i kontrolleve të shtuara dhe informacioneve të mara në rrugë operative, kanë evidentuar dhe goditur 1 rast të tentativës dhe 1 rast të kultivimit të bimëve narkotike cannabis sativa, në Njësinë Administrative Thumanë, Krujë.
Në vijim të veprimeve, u ndalua shtetasi Sh. S., 42 vjeç, banues në Gramëz, Krujë, për veprën penale “Kultivimi i bimëve narkotike”, i shpallur në kërkim, pasi Gjykata e Rrethit Gjyqësor Krujë i ka vendosur masën e sigurisë “Arrest në burg” për të njëjtën vepër penale. Në momentin e kapjes, në fshatin Mallkuç, efektivet e Policisë kanë konstatuar këtë shtetas duke hapur 50 gropa si ato që përdoren për kultivimin e bimëve narkotike canabis sativa.
Gjithashtu, shërbimet e Policisë Krujë kanë arrestuar në flagrancë shtetasin T. Sh., 47 vjeç, banues në Mallkuç, pasi gjatë kontrollit të ushtruar në oborrin e banesës së tij, kanë gjetur të kultivuara disa bimë cannabis sativa, të cilat u sekuestruan në cilësinë e provës materiale.
Materialet i kaluan Prokurorisë së Rrethit Gjyqësor Krujë, për veprime të mëtejshme./albeu.com
