Kryeministri bullgar Rumen Radev njoftoi se dy anije mallrash në afërsi të bregdetit bullgar të Detit të Zi u goditën nga dronë, ndërsa njëra prej tyre u fundos. Sipas tij, 11 marinarë rezultojnë të zhdukur. Radev e cilësoi sulmin të papranueshëm, tha se do të thërriste ambasadorin rus dhe se incidenti ishte raportuar në NATO.
Të lidhura
None found
Në një postim në Facebook, kryeministri tha se alarmi i parë ishte marrë në orën 01:30 dhe lidhej me një anije në vështirësi, ekuipazhi i së cilës u shpëtua. Anija, e cila mbante flamurin e Maltës dhe ishte në pronësi të Ukrainës, ishte goditur nga tre dronë.
Radev bëri të ditur se më pas ishte sulmuar edhe një anije tjetër, e cila u fundos. Në atë moment, sipas tij, ishte shpëtuar një pjesëtar i ekuipazhit.
Duke reaguar ndaj ngjarjes, kryeministri bullgar deklaroi se sulmi ndaj anijeve tregtare pranë ujërave territoriale të Bullgarisë ishte i papranueshëm. Ai shtoi se do të komunikonte për këtë çështje me Sekretarin e Përgjithshëm të NATO-s, Mark Rutte.
Të dhënat e qeverisë bullgare tregojnë se goditja e parë ndodhi 18 milje detare në lindje të Byala-s, ndërsa incidenti i dytë u regjistrua 17 milje në lindje të Krapets. Të dyja janë qytete bregdetare në Detin e Zi.
Anija e parë, Chelsea 3, e regjistruar në Odessa, kishte në bord shtatë shtetas ukrainas dhe tetë azerbajxhanas. I gjithë ekuipazhi u transportua në portin e Varnës, ndërsa pesë persona po marrin trajtim mjekësor për dëmtime të lehta.
Autoritetet bullgare thanë se nga anija e dytë janë shpëtuar pesë anëtarë të ekuipazhit, ndërsa 11 të tjerë vazhdojnë të jenë të zhdukur.
Media vendase raportoi se anija e mallrave quhej Azov Concord. Kompania turke që merret me menaxhimin e saj ende nuk ka dhënë një koment për ngjarjen.
Radev tha se nuk ekzistonte ende ndonjë provë e qartë dhe e pakundërshtueshme për të akuzuar njërën apo tjetrën palë. Megjithatë, ai shtoi se, sipas autoriteteve bullgare, përgjegjësia për sulmet i atribuohet Rusisë.
Ministri i Jashtëm ukrainas Andriy Sybiha kërkoi në platformën X shtimin e presionit ndaj Rusisë, duke e përshkruar Detin e Zi si një rrugë jetike për sigurinë ushqimore globale.
Sybiha tha gjithashtu se Rusia po kryen sulme në këtë zonë me synimin për ta përdorur urinë si armë dhe për të mbajtur peng të gjithë botën.
Edhe Presidentja e Komisionit Evropian, Ursula von der Leyen, dënoi sulmet dhe kërkoi që autorët e tyre të mbajnë përgjegjësi.
Përmes platformës X, von der Leyen deklaroi se Deti i Zi është shndërruar në një tjetër front të përshkallëzimit të luftës së Rusisë në Ukrainë, duke e cilësuar situatën të papranueshme.
