Administrata Trump ka propozuar që qeveria amerikane të investojë 5 miliardë dollarë në një fond të ri për Lindjen e Mesme, i cili do të synonte riparimin dhe forcimin e infrastrukturës energjetike të dëmtuar nga lufta me Iranin. Nisma do të kishte gjithashtu për qëllim uljen e varësisë së rajonit nga Ngushtica e Hormuzit, sipas dokumenteve të shqyrtuara nga CNN.
Të lidhura
None found
Propozimi gjashtëfaqësh mban emrin Partneriteti për Ndërtimin dhe Besimin e Aleatëve (PACT) dhe parashikon krijimin e një fondi strategjik prej 50 miliardë dollarësh. Ky fond do të financonte ndërtimin e tubacioneve, rafinerive, porteve dhe projekteve të tjera të mëdha infrastrukturore.
Presidenti Donald Trump pritet ta paraqesë këtë plan për diskutim me drejtuesit e vendeve të Gjirit më vonë sot në Nju Jork, thanë burime për CNN. Dokumenti nisi të qarkullonte që javën e kaluar.
Vendet pjesëmarrëse parashikohet të japin kontributet e tyre financiare, megjithatë ende nuk dihet se cilat prej tyre do të investojnë konkretisht. Burime rajonale i thanë CNN se disa shtete të Gjirit pritet ta mbështesin nismën, por nuk kanë planifikuar investime në këtë fazë.
Këto burime shprehën skepticizëm se projekti do të ndihmonte në përfundimin e konfliktit, i cili së fundmi është zgjeruar me përfshirjen e Huthëve të mbështetur nga Irani në sulme agresive në Detin e Kuq dhe në Arabinë Saudite.
Gatishmëria e Shteteve të Bashkuara për të financuar riparime dhe ndërtime të reja tregon përmasat e dëmeve që lufta ka shkaktuar në rajon, si në infrastrukturë, ashtu edhe në eksportet e energjisë.
Dokumenti përmend gjithashtu fondet globale dhe kompanitë e pasurisë sovrane si subjekte që “mund të investojnë në marrëveshje individuale”. Në listë përfshihen KKR, Blackstone, KBIC dhe Global Infrastructure Partners.
Plani shoqërohet me një hartë ku paraqiten disa prej projekteve të reja infrastrukturore të propozuara, si dhe me një afat kohor që përcakton se njoftimet e para për projektet do të bëhen në janar. Propozimi u raportua fillimisht nga Wall Street Journal.
Megjithatë, përmbajtja e versionit përfundimtar mund të pësojë ndryshime, pasi dokumentet e shqyrtuara nga CNN ishin shënuar si draft.
