Hayden Panettiere u gjet pa ndjenja më 16 gusht në apartamentin e saj në Karolinën e Jugut, ku ndodhej me të dashurin Brian Hickerson dhe vëllain e tij, Zach Hickerson. Sipas policisë, shërbimet e emergjencës u njoftuan nga një person i njohur i aktores.
Të lidhura
None found
Një oficer që shkoi në apartament deklaroi se pa paramedikët duke i bërë CPR një gruaje që nuk reagonte. Ai shtoi se në ato çaste nuk u vu re ndonjë shkak i dukshëm fizik që mund të shpjegonte gjendjen e saj.
Zyra e mjekut ligjor të qarkut Greenville konfirmoi se aktorja amerikane humbi jetën si pasojë e efekteve toksike të fentanilit dhe substancave të tjera.
Në trupin e 36-vjeçares u zbuluan gjurmë fentanili, 4-ANPP, alprazolami, metokarbamoli dhe quetiapina. Mjekët ligjorë nuk konstatuan shenja traume dhe e klasifikuan mënyrën e vdekjes si aksidentale.
Edhe Departamenti i Policisë së Greenville bëri të ditur se hetimi paraprak nuk nxori prova për një veprimtari të paligjshme ose për rrethana të dyshimta.
Vdekja e Panettiere, e cila ndodhi më 16 gusht në apartamentin e saj në Karolinën e Jugut, u pasua nga një reagim i familjes. Babai i saj, Skip Panettiere, tha se e bija kishte sjellë dashuri e gëzim te njerëzit që e njihnin, si edhe te miliona fansat që e kishin ndjekur në ekran.
Aktorja e nisi karrierën shumë herët dhe fitoi njohje ndërkombëtare përmes roleve në serialet “Heroes” dhe “Nashville”.
Roli i këngëtares së muzikës country Juliette Barnes në serialin “Nashville” i siguroi asaj dy nominime për Golden Globe. Mes filmave ku ajo ka luajtur janë “Scream 4” dhe “Scream VI”.
Në vitin 2014, Panettiere u bë nënë e një vajze, Kaya, që e pati me ish-të fejuarin e saj, boksierin ukrainas Wladimir Klitschko.
Gjatë viteve, aktorja kishte folur hapur për përballjen me depresionin pas lindjes, ankthin dhe varësinë nga substancat. Në intervista të mëparshme, ajo kishte treguar për procesin e rikuperimit dhe për përpjekjet e saj për të rindërtuar marrëdhënien me vajzën.
