Dënimi me 81 vite burg për ish-drejtuesit e UÇK-së, Kurti kërkon strategji shtetërore për përgjigjen ndaj verdiktit të Hagës

Pas vendimit të shkallës së parë të Dhomave të Specializuara në Hagë ndaj katër ish-drejtuesve të Ushtrisë Çlirimtare të Kosovës, kryeministri Albin Kurti ka bërë thirrje për hartimin e një strategjie të përbashkët shtetërore.

Qëndrimin e tij Kurti e bëri të ditur pas takimit me të rinj të diasporës shqiptare në Shtetet e Bashkuara. Ai deklaroi se Qeveria e Kosovës është e gatshme të mbështesë si përpjekjet gjatë procesit të apelimit, ashtu edhe angazhimin në rrafshin diplomatik.

Në një postim në Facebook, kryeministri shkroi se ekzekutivi i Republikës së Kosovës mbetet i vendosur të përdorë çdo formë mbështetjeje dhe të gjitha mjetet në dispozicion për korrigjimin e verdiktit të Dhomave të Specializuara ndaj ish-krerëve të UÇK-së.

Sipas Kurtit, vendimi është i padrejtë në aspektin juridik dhe moral, ndërsa historikisht dhe faktikisht është i pasaktë. Për këtë arsye, ai kërkoi që institucionet të bashkërendojnë qëndrimet dhe veprimet e tyre.

Ai vlerësoi se nevojitet dakordim për një strategji shtetërore që do të mundësonte reagimin më të përshtatshëm dhe më efikas ndaj verdiktit të shkallës së parë, si përmes ndihmës ndaj ekipeve në instancat e apelit, ashtu edhe në planin diplomatik.

Kurti njoftoi gjithashtu se Kosova do ta vijojë bashkëpunimin me aleatët ndërkombëtarë dhe angazhimin e pandërprerë për mbrojtjen e luftës çlirimtare të UÇK-së përballë propagandës së Serbisë. Në të njëjtën kohë, ai kërkoi vazhdimin e dokumentimit dhe zbardhjes së masakrave dhe krimeve të tjera të kryera nga Serbia në Kosovë.

Gjatë takimit me të rinjtë e diasporës në New York u trajtuan edhe tema që kishin të bënin me ekonominë dhe përmirësimin e sistemit gjyqësor.

Dhomat e Specializuara në Hagë dënuan në mesjavë Hashim Thaçin, Jakup Krasniqin, Kadri Veselin dhe Rexhep Selimin me gjithsej 81 vite burgim. Katër të dënuarit kanë njoftuar se do ta ankimojnë vendimin në Apel.

Ndërkohë, në Kosovë janë mbajtur protesta kundër këtij verdikti, teksa vazhdon diskutimi mbi masat që duhet të ndërmerren në nivel institucional dhe diplomatik.