Holanda u përball me kaos në trafik pasi fermerët ndezën zjarre pranë autostradave, ndërsa autoritetet nisën hetimet për një akt sabotimi në rrjetin hekurudhor, në prag të çeljes zyrtare të sesionit të ri parlamentar.
Të lidhura
None found
ProRail, kompania përgjegjëse për administrimin e infrastrukturës hekurudhore në vend, njoftoi se tuba të hollë ishin fiksuar me qëllim në shina në mbi 20 lokacione. Shumica e rasteve u evidentuan në zona rurale të pjesëve qendrore dhe lindore të Holandës.
Vendosja e tubave solli pezullimin e qarkullimit të trenave në linjat e prekura dhe shkaktoi vonesa e ndërprerje të ndjeshme edhe në segmente të tjera të rrjetit, mes tyre edhe në linjat ndërkombëtare që lidhin Holandën me Gjermaninë.
Sipas ProRail, materialet nuk ishin vendosur aksidentalisht, ndaj ngjarja është trajtuar si sabotim. Përveç pengimit të trenave, tubat ndikuan edhe në qarkullimin rrugor, pasi disa kalime në nivel u mbyllën.
Për zbardhjen e rastit është angazhuar edhe AIVD, agjencia holandeze e inteligjencës, e cila po punon së bashku me policinë dhe prokurorët. Deri tani, AIVD nuk ka bërë publike të dhëna për hetimin.
Ndërkohë, rreth mesditës, në disa pika përgjatë autostradave u regjistruan zjarre. Si pasojë, autoritetet mbyllën pjesë të rrugëve, ndërsa trafiku pësoi vështirësi të mëdha.
Forca e Mbrojtjes së Fermerëve deklaroi se pas zjarreve qëndronin fermerë të revoltuar, të cilët zgjodhën ditën e prezantimit të buxhetit qeveritar për të djegur balla me sanë dhe goma automjetesh.
“Ndjejmë sikur vendi është në flakë. Fermerët ndiejnë sikur bizneset e tyre po digjen nga planet e qeverisë”, u shpreh zëdhënësja e organizatës, Sita van Keberma.
Organizata hodhi poshtë çdo përgjegjësi për dëmtimin e linjave hekurudhore, por nuk përjashtoi mundësinë që veprime të tilla të jenë kryer individualisht nga fermerë të zemëruar.
Protestat kanë në qendër planet e qeverisë për buxhetin e vitit 2027, të cilat fermerët i kundërshtojnë prej muajsh. Ata thonë se po mbajnë padrejtësisht përgjegjësi për ndotjen nga nitratet dhe kundërshtojnë projektet për restaurimin e habitateve, pasi këto masa mund të ndikojnë në aktivitetin e tyre.
Projektbuxheti u bë publik nga Mbreti Willem-Alexander në nisje të mandatit të ri parlamentar. Në fjalimin e hartuar nga Kryeministri Rob Yeats, mbreti tha se do të ishte “e papërgjegjshme” të mos trajtohej ndotja nga azoti, edhe në rast se masat do të sillnin pasoja për fermerët.
Qeveria ka deklaruar se do të ofrojë kompensim financiar për fermerët dhe bizneset që preken nga planet për restaurimin e habitateve.
