Deputeti i Lidhjes Demokratike të Kosovës, Paris Guri, deklaroi para mediave se subjekti i tij politik nuk do të votojë pro Qeverisë Kurti.
Të lidhura
None found
Guri bëri të ditur gjithashtu se aktualisht po zhvillohet një mbledhje e Grupit Parlamentar të LDK-së.
Duke folur për mundësinë e takimeve mes Albin Kurtit dhe Lumir Abdixhikut, ai tha se ato nuk mund të zhvillohen, pasi nga ora 14:00 është caktuar seanca e Kuvendit të Kosovës.
“Nuk ka takime mes Kurtit dhe Abdixhikut, pasi prej orës 14:00 është seanca e Kuvendit të Kosovës. Është e pamundur që të jenë në të dyja vendet njëkohësisht”, deklaroi Guri.
Ai tha se nuk ka dijeni nëse gjatë mbrëmjes do të mbahet edhe seanca për votimin e presidentit.
Sipas Gurit, njoftimi i deputetëve vetëm 15 minuta para fillimit të seancës, e planifikuar për orën 14:00, është i papërgjegjshëm dhe ua vështirëson atyre pjesëmarrjen fizike në Kuvend.
“Mendoj që është pak e papërgjegjshme, sepse deputetët janë njoftuar vetëm 15 minuta para mbajtjes së seancës, e cila fillon në ora 14:00, gjë që e pamundëson ardhjen fizike të deputetëve në Kuvend”, deklaroi Guri.
