Pas më shumë se dhjetë vitesh pritjeje, të enjten u hapën paraporositë për kapitullin e ri të serisë “Grand Theft Auto”, por shumë adhurues mbetën të pakënaqur pasi “GTA VI” do të ofrohet vetëm si shkarkim digjital.
Shumë lojtarë vijojnë t’i parapëlqejnë disqet fizike në vend të kodeve për shkarkim, pasi i konsiderojnë ato si një formë pronësie të vërtetë mbi lojën. Ndryshe nga to, versionet vetëm digjitale nuk mund të rishiten apo t’u kalohen përdoruesve të tjerë.
Të lidhura
None found
Vendimi që loja të dalë vetëm në format digjital, të paktën tani për tani, ka sjellë reagime kritike si nga komuniteti i lojtarëve, ashtu edhe nga komentues të industrisë së videolojërave. Edhe ata që do të zgjedhin të blejnë një version fizik, në paketim do të gjejnë vetëm një kod për shkarkim.
Rockstar e paraqet këtë si një lehtësi krahasuar me disqet tradicionale. Sipas kompanisë, “Lojtarët që bëjnë paraporosi të versioneve digjitale të ‘Grand Theft Auto VI’ do të mund të fillojnë parashkarkimin më 12 nëntor për t’u siguruar që mund të luajnë në momentin e lançimit.”
Megjithatë, në rrjetet sociale nuk mungojnë dyshimet. Shumë fansa pretendojnë se Rockstar po e ndërmerr këtë hap për të penguar rishitjen e lojës me çmime më të ulëta pasi ajo të jetë përfunduar nga blerësit.
“Ky është thjesht një veprim për të ndalur shitjet e dorës së dytë dhe për të kontrolluar çmimin e lojës,” ka shkruar një përdorues në Reddit. Ndërsa faqja e argëtimit IGN ka komentuar: “Duke të hequr mundësinë e ndikimit, je i detyruar të paguash çfarëdo që Rockstar dhe platformat e shitjes e konsiderojnë të arsyeshme.”
Edicioni standard i lojës do të kushtojë 80 dollarë, ndërsa ai premium 100 dollarë. Me këto tarifa, seria e famshme po vendos një prag të ri për lojërat premium, duke e kaluar nivelin prej 70 dollarësh që është kërkuar zakonisht për titujt më të rëndësishëm të viteve të fundit.
Në fazën e parë, “GTA VI” do të dalë vetëm për konsolat PlayStation 5 dhe Xbox Series X|S, ndërsa përdoruesit e PC-së do të duhet të presin më gjatë. Një version multiplayer online parashikohet të publikohet më vonë dhe nuk do të përfshihet në çmimin fillestar.
Loja aksion pritet të dalë më 19 nëntor, pas disa shtyrjeve, ndërsa interesi i lartë i treguar që tani nga blerësit e mundshëm lë të kuptohet se ajo mund të shndërrohet në një nga titujt më të suksesshëm në historinë e videolojërave.
Pritja e fansave ka qenë e gjatë, pasi pjesa paraardhëse e serisë doli në treg në vitin 2013.
Me një buxhet të përllogaritur mbi 1 miliard dollarë, “GTA VI” pritet të bëhet produkti më i kushtueshëm i argëtimit në histori. Ndërkohë, loja pararendëse ka shitur më shumë se 200 milionë kopje që nga viti 2013.
“Grand Theft Auto” mbetet një nga seritë më të njohura të videolojërave në botë dhe për herë të parë është publikuar në vitin 1997. “Grand Theft Auto VI” zhvillohet në një version imagjinar të qytetit amerikan të Majamit, ndërsa trailerët e publikuar deri tani kanë sjellë skena me ndjekje makinash me shpejtësi të lartë, skafe të shpejta, plazhe, armë dhe krokodilë./ AA
