Investimi te futbollistët e rinj është i domosdoshëm për të ardhmen e futbollit, ka vlerësuar Samir Ujkani, anëtar i Komitetit Ekzekutiv të Federatës së Futbollit të Kosovës.
Në një intervistë në Baku të Azerbajxhanit, ku u zhvillua edicioni i parë i Kupës së Botës dhe Festivalit FIFA U-15, Ujkani foli për mundësitë që kjo ngjarje u krijon lojtarëve të rinj për t’u zhvilluar dhe për të ndarë përvoja me bashkëmoshatarë nga vende të tjera.
Të lidhura
None found
Ai tha se ishte i kënaqur me pjesëmarrjen e Kosovës dhe paraqitjen e ekipit në turne. Sipas tij, organizimi u dha fëmijëve jo vetëm mundësinë të luajnë futboll, por edhe të njihen me njëri-tjetrin.
Duke iu referuar investimeve të FIFA-s dhe mbështetjes financiare prej 25 milionë dollarësh për secilën federatë anëtare gjatë këtij cikli, Ujkani theksoi se zhvillimi i futbollit nis te moshat e reja. Çdo ndihmë për lojtarët e rinj, tha ai, është investim në një të ardhme më të ndritur për këtë sport, ndaj shprehu shpresën për më shumë turne të ngjashëm.
Ujkani foli edhe për vizionin e FIFA-s që futbolli të jetë i qasshëm për të gjithë. Ish-portieri i Përfaqësueses së Kosovës vlerësoi se ky sport ka aftësinë të afrojë njerëz nga vende e kultura të ndryshme dhe se përpjekjet në këtë drejtim duhet të vazhdojnë.
Përfaqësuesja e Kosovës U-15 e mbylli turneun me tri fitore në pesë ndeshjet e fazës së grupeve. Mes rezultateve spikatën fitorja me rikthim 2-1 ndaj Afrikës së Jugut dhe triumfi 6-1 kundër Burundit në ditën e fundit të garave.
Turneu në Baku përfundoi më 30 tetor, pasi bëri bashkë mbi 3.000 futbollistë dhe zyrtarë nga 189 vende. Për 78 prej këtyre vendeve, mes tyre edhe Kosova, ishte pjesëmarrja e parë në një ngjarje të Kupës së Botës të organizuar nga FIFA.
Edicioni për vajza është planifikuar për vitin 2027. Nga viti 2028, të dy turnetë pritet të zhvillohen çdo vit.
