Njeriu më i pasur i Britanisë synon blerjen e Man United

Brenda një dite nga njeriu më i pasur i planetit te njeriu më i pasur i Anglisë. Pas përgënjeshtrimit të Elon Musk, në skenë për të blerë Man. United del një tjetër personazh. Bëhet fjalë për Sir Jim Ratcliffe, i cili e ka bërë të qartë se dëshiron të blejë shumicën e aksioneve që aktualisht është në duart e familjes, Glazer.

Një zëdhënës i një prej kompanive që zotëron Ratcliffe, bën me dije se ai e shikon veten si një nga blerësit e mundshëm të “Djajve të kuq”, aktualisht në një krizë të thellë. Ideja e miliarderit britanik është blerja e një pjese të klubit për momentin me premtimin se në të ardhmen mund të marrë gjithë drejtimin e tij.

“Nëse klubi do të jetë në shitje atëherë Jim do të jetë në radhën e parë për ta blerë”, thekson zëdhënësi i kompanisë Ineos në një intervistë për “The Times”.

69-vjeçari tentoi edhe blerjen e Chelseat përpara se një gjë të tillë ta bënte Todd Boehly për rreth 5 miliardë euro.