David Kogan, president i organit rregullator të futbollit anglez, tha se do të largohej nga detyra nëse do të kishte ndërhyrje politike në procesin për masat e mundshme ndaj Manchester Cityt.
Të lidhura
None found
Klubi përballet me akuza për shkelje të shumta të rregullave financiare të Ligës Premier. Sanksionet e mundshme përfshijnë gjoba të mëdha, zbritje pikësh, madje edhe përjashtim nga elita e futbollit anglez.
Akuzat janë shqyrtuar nga një panel i pavarur. Manchester City, i mbështetur financiarisht nga pronarë nga Emiratet e Bashkuara Arabe, akuzohet se ka raportuar në mënyrë të pasaktë të dhënat financiare gjatë viteve 2009–2018. Në atë periudhë, klubi fitoi tri tituj të Ligës Premier dhe afroi futbollistë të nivelit më të lartë.
Vendimi përfundimtar ende nuk është dhënë, ndërsa pritet të zgjidhet çështja e ankesës së Manchester Cityt.
Kogan këmbënguli se organi rregullator do të veprojë i pavarur dhe nuk do të ndikohet politikisht, pavarësisht lidhjeve mes qeverive të Mbretërisë së Bashkuar dhe Emirateve të Bashkuara Arabe.
“Pavarësia jonë është absolute, po ashtu edhe pavarësia ime personale. E kam bërë të qartë se çdo ndërhyrje politike në mënyrën tonë të veprimit do të më shtynte të jepja dorëheqje nga kjo detyrë”, deklaroi ai.
“Dua ta them qartë: nuk kemi qenë nën asnjë presion politik lidhur me këtë çështje, apo me ndonjë tjetër”, shtoi Kogan.
Tifozët e futbollit vijojnë të presin përfundimin e çështjes së Manchester Cityt. Disa prej tyre kërkojnë masa të ashpra ndaj klubit dhe e shohin përjashtimin nga futbolli profesionist si një ndëshkim të mundshëm.
Tashmë mbetet të shihet si do të mbyllet procesi dhe çfarë pasojash do të ketë për Man Cityn.
