Zgjedhja e vendit ku do të luhet finalja e Kupës së Botës 2030 ka marrë një tjetër përmasë politike pas qëndrimit të Alberto Nunez Feijoo. Kandidati kryesor për t’u bërë kryeministri i ri i Spanjës paralajmëroi se vendi i tij mund të heqë dorë nga bashkëorganizimi nëse ndeshja për titull i besohet Marokut.
Në një paraqitje në emisionin El Chiringuito të televizionit La Sexta, kreu i opozitës spanjolle e lidhi mbështetjen për projektin me një kusht të qartë: finalja të zhvillohet në Spanjë, jo në Marok. Sipas tij, Spanja është vendi i drejtë dhe i përshtatshëm për këtë ndeshje, një zgjedhje për të cilën nuk duhet të ketë dyshime.
Të lidhura
None found
Kur u pyet në mënyrë të drejtpërdrejtë nëse do ta largonte Spanjën nga organizimi i përbashkët po qe se Maroku siguronte finalen, Feijoo dha një përgjigje të vetme: “Po”.
Debati për vendndodhjen e finales vijon prej muajsh dhe stadiumi pritës ende nuk është përcaktuar. Mungesa e një vendimi ka ushqyer diskutime të gjera mes shteteve që do të organizojnë turneun.
Projekti parashikon që pjesa kryesore e kampionatit të zhvillohet në Spanjë, Marok dhe Portugali, ndërsa Amerika e Jugut do të presë tri takimet hapëse.
Favoriti për të marrë finalen është stadiumi i planifikuar “Hassan II” në Kazablanka, për të cilin parashikohet një kapacitet prej 115 mijë ulësesh. Përballë tij konkurrojnë edhe Madridi me “Santiago Bernabeun” dhe Barcelona me “Camp Noun”, që po lobojnë për të pritur ndeshjen vendimtare.
Në vlerësimin e Feijoo, argumentet në favor të Spanjës janë më bindëse. Ai solli në vëmendje se kandidatura fillestare përfshinte Spanjën dhe Portugalinë, kurse Maroku u përfshi në projekt më vonë.
Për të mbështetur qëndrimin e tij, lideri i opozitës iu referua edhe sukseseve të fundit të futbollit spanjoll. Ai theksoi pozitën e veçantë të vendit, kombëtaret e të cilit kanë fituar tituj botërorë si te meshkujt, ashtu edhe te femrat.
Në përfundim, Feijoo këmbënguli se, nëse Spanjës nuk i jepet organizimi i finales, ajo nuk duhet të jetë pjesë as e organizimit të turneut.
