Maqedonia e Veriut është përfshirë zyrtarisht në Korridorin Vertikal të gazifikimit, bëri të ditur sot partia VLEN. Memorandumi për këtë anëtarësim u nënshkrua në Selanik nga drejtori i NOMAGAS-it, Nedim Rama.
Të lidhura
None found
Sipas VLEN-it, pjesëmarrja në këtë korridor i krijon vendit mundësi për të zgjeruar burimet e furnizimit me gaz dhe për të shmangur varësinë nga një burim ose një rrugë e vetme. Partia vlerëson se kjo marrëveshje njëkohësisht rrit rolin e Maqedonisë së Veriut në sistemin energjetik të rajonit.
VLEN thekson se kriza energjetike e viteve të fundit ka nxjerrë në pah nevojën për të pasur burime dhe korridore të ndryshme furnizimi. Në këtë kuadër, hapja e kanaleve të reja shihet si e rëndësishme jo vetëm për zhvillimin ekonomik, por edhe për sigurinë energjetike të vendit.
Partia ka vlerësuar punën e drejtorit të NOMAGAS-it, Nedim Rama, si dhe të gjithë ekipit të kompanisë. Sipas komunikatës, marrëveshja është arritur pas një procesi disa-mujor negociatash dhe bashkërendimi me partnerët rajonalë.
