Ministri i Drejtësisë, Jeton Shasivari, ishte sot pjesë e tryezës së rrumbullakët me temë “Përmirësimi i Funksionit Kërkimor dhe Analitik në Partitë Politike – Përvoja Ligjore dhe Krahasuese”.
Të lidhura
None found
Gjatë fjalës së tij, Shasivari vlerësoi se Qendrat Kërkimore dhe Analitike të Partive (QKAP) janë të rëndësishme për rritjen e cilësisë së politikave, forcimin e debatit publik dhe avancimin e proceseve demokratike.
Sipas tij, këto qendra duhet të shërbejnë si hapësira ku vendimmarrja politike testohet përballë fakteve, ndërsa të dhënat dhe analizat shfrytëzohen për të arritur në vendime më të mira.
Ministri nënvizoi se financimi i QKAP-ve me fonde publike sjell edhe detyrimin për llogaridhënie ndaj publikut, sidomos për cilësinë e kërkimeve, analizave dhe rekomandimeve të hartuara prej tyre.
“Fondet publike duhet të prodhojnë vlerë publike. Ato janë të destinuara për kërkime, analiza, zhvillim politikash dhe forcim të kapaciteteve profesionale. Për këtë arsye, nuk mjaftojnë vetëm rregullat që përcaktojnë mënyrën e shpenzimit të tyre; nevojitet edhe një kulturë përgjegjshmërie për rezultatet që prodhojnë këto fonde. Duhet të pyesim se cilat kërkime janë kryer, çfarë analizash janë përgatitur, cilat politika janë vlerësuar dhe çfarë rekomandimesh kanë dalë prej tyre. Po ashtu, duhet të dimë se si janë përdorur të dhënat dhe çfarë ndikimi kanë pasur këto qendra në hartimin e politikave. Këto pyetje nuk synojnë kufizimin e veprimtarisë politike, por ta bëjnë atë më serioze, më cilësore dhe më të përgjegjshme”, deklaroi Shasivari.
Ai vuri në dukje edhe nevojën për bashkëpunim mes partive politike në çështjet që lidhen me kërkimin dhe dijen.
“Mund të kemi qëndrime të ndryshme për vendimet, por duhet të pajtohemi se ato duhet të ndërtohen mbi të dhëna të sakta dhe analiza të thelluara”, tha Shasivari./Telegrafi/
