Një aksident i rëndë rrugor ka ndodhur në rrugën magjistrale që lidh Kërçovën me Ohërin, ku janë përfshirë tri automjete dhe kanë mbetur të lënduar disa persona, bën të ditur Ministria e Punëve të Brendshme.
Të lidhura
None found
Sipas informacionit zyrtar, ngjarja ka ndodhur më 27 korrik 2026, rreth orës 13:35, në afërsi të fshatit Drugovë. Në përplasje kanë marrë pjesë tri vetura: një “Volkswagen Tiguan” me targa të Prilepit, që drejtohej nga L.M., 76 vjeç, banues në Prilep; një “Volkswagen Golf” me regjistrim të Shkupit, nën timonin e S.P., 41 vjeç, nga Shkupi; si dhe një “Citroën” me targa të Kërçovës, të pilotuar nga R.R., 48 vjeç, nga fshati Greshnicë i komunës së Kërçovës.
Si pasojë e goditjes së fuqishme, lëndime të rënda ka marrë pasagjeri i “Citroën”-it, S.R., 79 vjeç, gjithashtu nga Greshnica. Ndërkohë, plagë më të lehta kanë pësuar edhe tre shoferët e përfshirë, si dhe udhëtarët e tjerë: G.R., 45 vjeç, nga Greshnica; C.M., 76 vjeç, nga Prilepi; M.P., 34 vjeçe, së bashku me dy fëmijët e saj të mitur, të gjithë nga Shkupi.
Të plagosurit janë dërguar për vlerësim mjekësor në Qendrën Shëndetësore të Kërçovës, ku janë konstatuar dëmtimet e pësuara. Policia e Kërçovës ka dërguar një skuadër në vendin e aksidentit për të kryer inspektimin e nevojshëm, thuhet në komunikatën e MPB-së./Telegrafi/
