As nga Ministria e Financave nuk vjen optimizëm se mund të gjendet një zgjidhje për 50 ish-punonjësit e Klinikës së Fëmijëve, të cilëve prej muajsh nuk u janë vazhduar kontratat dhe që ende presin një përgjigje pozitive nga institucionet përgjegjëse. Ministrja e Financave, Gordana Dimitrievska Koçoska, e justifikoi qëndrimin negativ për vazhdimin e kontratave me kufizimet e buxhetit dhe detyrimet financiare të krijuara nga punësimet e mëhershme në këtë institucion.
Sipas Koçoskës, në periudhën e kaluar Ministria e Financave ka dhënë pëlqime në përputhje me fondet e disponueshme për secilin institucion. Ajo tha se edhe në këtë rast të dhënat nuk janë dorëzuar siç duhet. Ministrja sqaroi se vitin e kaluar, në kohën kur ishin kërkuar pëlqime për kontrata në vepër, njëkohësisht ishte miratuar punësimi me afat të pacaktuar për 38 persona. Për këtë, tha ajo, është biseduar me drejtorin, të cilit i është bërë e qartë se në vitin pasues ndikimi fiskal i këtyre 38 punësimeve do të jetë më i lartë dhe se, për këtë arsye, buxheti duhet të përshtatet me obligimet e reja.
Të lidhura
None found
Ministrja theksoi gjithashtu se pëlqimet për punësim nuk lidhen me mjekët dhe infermierët, por kryesisht me personelin teknik, duke nënvizuar se çdo vendim i tillë duhet të jetë në harmoni me mundësitë buxhetore.
“Duhet patjetër të theksoj se kur bëhet fjalë për pëlqimet për punësim, nuk bëhet fjalë për punësimin e mjekëve dhe infermierëve. Nëse e pyesni drejtorin, le t’i paraqesë pëlqimet dhe të shohim nëse deri më tani Ministria e Financave ka refuzuar ndonjë kërkesë për mjek apo infermierë. Sa i përket personelit teknik, duhet të harmonizohet me mjetet financiare që kemi në dispozicion. Nuk mund të pajtohem me pretendimet se nuk kemi dhënë mbështetje, kur janë miratuar 38 pëlqime për punësim me afat të pacaktuar dhe janë punësuar më shumë se 65 persona, qoftë me afat të pacaktuar apo me kontratë. Nuk mund të japim pëlqime vetëm për një klinikë, sepse bëhet fjalë për një numër të konsiderueshëm punësimesh brenda një viti, ndërsa njëkohësisht duhet të kujdesemi edhe për klinikat e tjera”, deklaroi ministrja e Financave Gordana Dimitrievska Koçoska.
Pas deklaratës së ministres së Financave, reaguan ish-punonjësit, të cilët thanë se nuk është e drejtë që përgjegjësia të bartet vazhdimisht nga një institucion te tjetri, ndërsa askush të mos marrë konkretisht përgjegjësi dhe të mos japë zgjidhje. Ata shtuan se nuk janë ata që vendosin për punësimet, kontratat apo pagesat, por janë njerëzit që çdo ditë kanë shkuar në punë, kanë kryer detyrat e tyre dhe kanë mundësuar funksionimin normal të institucionit.
“Në vend që secili të tregojë me gisht drejt tjetrit, presim që të gjitha institucionet kompetente të ulen në një tryezë dhe më në fund të gjejnë zgjidhje. Punëtorët nuk duhet të jenë viktima të lëshimeve administrative, keqkuptimeve ndërinstitucionale apo përplasjeve politike”, thonë ish të punësuarit./Alsat/
