Zotohet Niko Peleshi: Nuk do të lejojmë që zjarri në Mirditë t’u afrohet banesave, në Sazan po e shuajmë me avion

Ministri i Mbrojtjes Niko Peleshi, përmes një postimi në Facebook, ka treguar sesi paraqitet situata me zjarret në Ishullin e Sazanit dhe në Mirditë.

Peleshi shkruan se prej orëve të para të mëngjesit ka nisur operacioni për shuarjen e flakëve nga ajri, me avionin Canadair Cl 415 të dërguar nga Greqia. Gjithashtu shton se 122 trupa të Forcave të Armatosura, mjete detare, zjarrfikës, etj janë duke punuar për të ndërprerë përhapjen e flakëve dhe nha ana tjetër 54 forca janë përqendruar në fshatin Elgjin, në Mirditë.

“Ka nisur prej orëve të para të mëngjesit operacioni nga ajri për shuarjen e zjarrit në ishullin e Sazanit. Avioni Canadair Cl 415, mbështetje nga Greqia dhe Mekanizmi i Mbrojtjes Civile të BE-së i është bashkuar aksionit që po vijon prej më shumë se 48 orësh nga terreni. 122 trupa të Forcave të Armatosura, mjete detare, zjarrfikës, etj janë duke punuar për të ndërprerë përhapjen e flakëve.

Nga ana tjetër 54 forca janë përqendruar në fshatin Elgjin, njësia administrative Orosh në Mirditë, ku prej ditës së djeshme vijon të jetë aktive një vatër zjarri.  Së bashku me forcat zjarrfikëse dhe mjetet e vëna në dispozicion po vijojnë operacionin për të mos lejuar që flakët t’u afrohen banesave aty pranë”, shkruan Peleshi./albeu.com