“The Lancet” kundër dozës së tretë: Është e panevojshme

Revista “The Lancet” ka dalë kundër një doze të tretë të vaksinës anti-covid.

Në kuadrin e debatit të madh që po zhvillohet kudo në botë për këtë çështje, pra për një dozë të tretë të vaksinës, prestigjozja ka thënë se është e panevojshme diçka e tillë.

Përmes një botimi gjatë orëve të fundit, revista shkencore shkruan vaksinat janë mjaft efektive për parandalimin e rasteve të rënda të koronavirusit, gjë e cila konfirmon se s’ka nevojë për një dozë të tretë.

Duke marrë në konsideratë edhe rrezikun e variantit “Delta” revista shkruan se megjithatë, kjo nuk do të thotë se popullsia ka nevojë për një vaksinë të tretë sepse dy doza janë të mjaftueshme.

Autorët, të cilët verifikuan provat klinike, zbuluan se vaksinat mbeten shumë efektive kundër simptomave të rënda të COVID-19, në të gjitha variantet kryesore të virusit përfshirë Delta, edhe pse ato kishin sukses më të ulët në parandalimin e sëmundjeve asimptomatike.

“Nëse vaksinat ofroheshin aty ku do të bënin më të mirën, ato mund të shpejtonin fundin e pandemisë duke frenuar evolucionin e mëtejshëm të varianteve,” thotë autori kryesor Ana-Maria Henao-Restrepo, nga OBSH.

Autorët e studimit argumentojnë se variantet aktuale nuk ishin zhvilluar sa duhet për t’i shpëtuar përgjigjes imune të ofruar nga vaksinat në përdorim, dhe nëse shfaqen mutacione të reja të virusit që ishin në gjendje t’i shmangeshin kësaj përgjigjeje, do të ishte më mirë të jepnim një vaksinë të modifikuar posaçërisht për këto variante.

Gjatë muajve të fundit disa shtete kanë nisur bërjen e dozave përforcuese, gjë që ka detyruar Organizatën Botërore të Shëndetësisë që të bëjë thirrje për kursin të dozave me qëllim që të mund të vaksinohen për herë të parë apo të dytë qytetarët e vendeve të treta./albeu.com


Shtuar 14.09.2021 13:04