Është zbardhur dosja e SPAK për arrestimet në Bashkinë e Lushnjes, ku duket se dhe vetë kryetari i bashkisë Fatos Tushe, është i përfshirë në korrupsion banal, siç është dhe dhënia e naftës për djemtë e biznesmenëve që iu jepte tendera.
Më konkretisht Tushe dhe punonjësi në varësi të tij Flamur Golemi, mbushnin me naftë makinat e djemve dhe punonjësve të biznesmenëve Ibrahim Lami dhe Bujar Murati.
Tushe shihet duke marrë pjesë në biseda aktive që Ibrahim Lami dhe djali i tij ta kishin plot me naftë serbatorin e makinës, dhe të mos fusnin asnjëherë dorën në xhep.
Marrëdhënia mes Tushes dhe Lamit duket e afërt, pasi në një moment tjetër të dosjes biznesmeni ndërhyn për një provim që vajza e kryebashkiakut ka në Tiranë.
Episodi i keqpërdorimit të karburantit:
Sipas akuzës, Flamur Peqini me detyrë drejtori i ndërmarrjes së pasurive publike në Bashkinë e Lushnjes, komunikon me menaxherin e një karburanti, ku e porosit që të furnizojë me naftë makina të ndryshme, një pjesë e të cilave nuk janë pronë e Bashkisë.
Në disa prej komunikimeve, Peqini urdhëron punonjësin e një karburanti, Daniel Nushi që të furnizojë me karburant shtetas që nuk janë të punësuar në bashki. Vetë kryebashkiaku Fatos Tushe, telefonon Peqinin duke i thënë: O Mule thuaji içik atij ti hedhi çunave me tre teta.
Pas kësaj telefonate Peqini telefonon Danielin dhe i thotë: Po vjen një makinë tjetër, hidhi asaj me tre teta o burrë i dheut. Shpejto tani tani direkt, atë me tre teta, është çuni i shefit. Pas kësaj telefonate Fatos Tushe ka telefonuar Flamurin dhe i thotë ”janë çunat aty re Mule, nuk i the gjë atij, ai i ka thënë jo nuk ka thënë gjë Flamuri”. Personi që ka furnizuar me karburant makinën është Brigel Lami, djali i biznesmenit Ibrahim Lami.
Danjeli i thotë se i ka hedhur ”85 litra vëlla”, Flamuri e pyet “Po ajo tjetra sa mori”, ”83″ i përgjigjet Danieli.
Më pas në orën 17:11, Danjeli telefonon Flamurin dhe i thotë ”kam këtë çunin e shefit këtu o…”, Flamuri i thotë: çunin e shefit? Okej mbushe dhe më ço mu mesazh sa litra i hodhe.
Një tjetër rast është kur shtetasi F.F telefonon kryetarin e Bashkisë Lushnje, dhe i thotë që ”nesër në mëngjes do iki për pushime, do futem në Lushnje nga ora 07:30″, Fatosi i thotë që ”do nxjerr drejtorin e burimeve njerëzore, pasi vetë do të jem në Karaburun”.
Ndër të tjera kryebashkiaku Tushe i thotë se ai e di vendin dhe të shkojë atje, e mos ta vrasë mendjen.
Të nesërmen Fatosi telefonon Flamurin dhe ndër të tjera e pyet nëse ”a erdhi F… se i thashë Turit”
Flamuri thotë që i ka thënë Turi, por ka menduar se po tallej. Flamuri ndër të tjera i thotë që ndodhet te karburanti dhe po pret “Braçen”. Sipas raportit të vëzhgimit mjeti në fjalë ka marrë karburant dhe nuk ka paguar. Flamurin e telefonon djali i Ibrahimit dhe i thotë: Mule si kalove, djali i Braçes jam, numri është i shoferit, po më tha babi dhe jam këtu te karburanti” Flamuri i thotë që ti kalojë punëtorin e karburantit të cilit i thotë “mbushe dhe më thuaj sa mori, Po Gersi sa mori?”, punëtori përgjigjet “40 mori”. Ndërkohë që djali i biznesmenit rezulton se ka marrë 84 litra.
