Haradinaj: Nëse Kosova nuk anëtarësohet në NATO atëherë të bashkohemi me Shqipërinë!

Kryetari i Aleancës për Ardhmërinë e Kosovës, Ramush Haradinaj, deklaroi se nëse Kosovës i pamundësohet anëtarësimi në OKB dhe NATO, duhet të bashkohet me Shqipërinë.

Ai tha se shqiptarët asnjëherë më parë nuk kanë qenë më të sigurt se tani me prezencën e NATO-s.

“Shqiptarët kurrë në jetë nuk kanë qenë më afër një organizimi të sigurt, çfarë është NATO. Shqipëria është në NATO e ne jemi afër NATO-s, edhe Kosova duhet të jetë në NATO….Nëse i pamundësohet Kosovës anëtarësimi në OKB dhe në NATO, ne duhet të bashkohemi më Shqipërinë”,– theksoi ish-kryeministri.

Sipas Insajder, Haradinaj këto komente i bëri gjatë manifestimit qendror në Verrat e Llukës së Deçanit, ku është bërë pajtimi i gjaqeve 22 vite me parë.

Pjesë e këtij manifestimi ishte edhe kryetari i Komunës së Deçanit, Bashkim Ramosaj, i cili tha se dita e pajtimit të gjaqeve është ngjarja më madhështore që i ka ndodhur kombit shqiptar.

“Çdo komb gjatë rrugëtimit tij, në udhëkryqet e tij i ka gjestet më të mëdha historike, e ka përcaktimin që bënë një ngjarje madhështore në vitet e 90-ta, pavarësisht të gjitha ngjarjeve që pasojnë para dhe pas saj. Unë besoj dhe vlerësoj që është ngjarja më madhështore që i ka ndodhur kombit tonë”,- pohoi Ramosaj.


Shtuar 1.05.2021 17:25