Protestat e mbajtura dje përpara Parlamentit dhe Policisë, së bashku me tubimet e njëpasnjëshme të diasporës shqiptare, kanë nxitur reagime të forta nga personat e përfshirë në terren. Mes tyre ishte edhe biznesmeni Erind Xhindi, i pranishëm gjatë përplasjeve me policinë, i cili rrëfeu me hollësi atë që e cilëson si një skemë të menduar nga efektivët për të shtypur dhe fragmentarizuar revoltën qytetare.
Sipas Xhindit, gjithçka nisi në çastet kur tensioni u rrit përpara godinës së Parlamentit. Ai thotë se në atë moment, vëmendja kryesore e policisë nuk ishte ruajtja e rendit publik, por mbrojtja fizike e deputetëve të mazhorancës, ndërsa në terren u shtuan forcat policore për të ushtruar presion dhe dhunë mbi protestuesit.
Të lidhura
None found
“Në momentin që ne gjuanim me vezë, vëmendja e policëve ishte te ruajtja e deputetëve. Aty erdhën forca të shtuara besoj në formë trysnie. Vazhdon e njëjta situatë, kjo qeveri vijon me tërheqje zvarrë, me pengmarrje,” deklaron Xhindi, duke akuzuar policinë për sjellje agresive ndaj qytetarëve.
Ai ka përshkruar gjithashtu se, sipas tij, shtimi i trysnisë nga ana e policisë dhe mënyra si u veprua me protestuesit e arrestuar kishin një synim të qartë: mbrojtjen e zyrtarëve dhe shpërndarjen e turmës.
Më pas, biznesmeni shpjegoi edhe arsyen pse protesta u zhvendos menjëherë nga Parlamenti drejt Drejtorisë së Policisë së Tiranës. Sipas tij, policia ndoqi një taktikë të caktuar për të larguar vëmendjen nga pika më e nxehtë e protestës, duke dërguar të arrestuarit në komisariate të ndryshme të kryeqytetit me qëllim që të çorientonin dhe ndanin protestuesit.
Xhindi pretendon se sapo autoritetet arritën objektivin e tyre dhe Parlamenti u zbraz, nisi menjëherë lirimi i personave të shoqëruar, element që sipas tij provon natyrën manipulative të kësaj skeme.
“Më pas vijuam protestën te policia e Tiranës. Mendoj se kanë dashur të shpërndajnë vëmendjen nga Parlamenti, ndaj kanë çuar protestuesit e arrestuar në disa komisariate. Ata dolën menjëherë pasi ikëm ne nga Parlamenti,” sqaron Erind Xhindi.
