Të paktën pesë persona u vranë dhe rreth 17 të tjerë mbetën të plagosur nga sulmet ajrore të Ukrainës në jug të Rusisë, sipas njoftimeve të autoriteteve rajonale ruse.
Të lidhura
None found
Bilanci më i rëndë u shënua në Rostov-on-Don, qytet pranë Detit Azov, pasi një dron goditi një ndërtesë banimi. Në fillim u njoftua se kishte humbur jetën një çift, por ekipet e kërkim-shpëtimit gjetën më pas nën rrënoja trupat e tre personave të tjerë, përfshirë një fëmijë.
Guvernatori i rajonit të Rostovit deklaroi se nga goditja u plagosën pesë persona, dy prej të cilëve ndodhen në gjendje kritike. Mbetjet e dronëve që ranë në qytet ndezën gjithashtu disa vatra zjarri.
Në Belgorod u regjistrua një tjetër goditje me dronë, e cila la të plagosur 12 persona, mes tyre dy fëmijë. Sipas autoriteteve, në një pallat banimi shpërtheu edhe zjarr si pasojë e sulmit.
Në të njëjtën kohë, forcat ruse vijuan bombardimet në Ukrainë. Autoritetet lokale raportuan se në rajonin e Zaporizhias një civil u vra dhe dy persona të tjerë u plagosën nga një sulm me bombë ajrore të drejtuar dhe dronë.
Forcat ruse shënjestruan edhe rajonin verior të Sumyt, ku persona mbetën të plagosur nga goditja e një bombe ajrore të drejtuar.
