Në qytetet kryesore të Iranit kanë filluar ceremonitë përkujtimore për Ali Khamenein, të cilat do të arrijnë kulmin më 9 korrik me zhvillimin e funeralit të tij.
Autoritetet e vendit po përgatisin një ceremoni në përmasa të mëdha, të shoqëruar nga masa të ashpra sigurie dhe një angazhim i gjerë i qytetarëve për të marrë pjesë në homazhe dhe në kortezhin mortor.
Të lidhura
None found
Teherani, së bashku me qytetet e shenjta Qom dhe Mashhad, kanë shpallur ditë pushimi, ndërsa bizneseve u është kërkuar të mbyllen nga e shtuna deri të hënën. Ceremonia publike do të hapet të shtunën në kompleksin Grand Mosalla, në zemër të Teheranit, vendi ku mbahen lutjet e së premtes dhe tubimet më të mëdha fetare në Iran.
Sipas planit të bërë publik nga autoritetet, gjatë ceremonisë do të ekspozohen edhe trupat e disa prej të afërmve të vrarë të Khameneit, krahas trupit të tij. Ende nuk dihet nëse në funeral do të jetë i pranishëm djali i tij, Mojtaba Khamenei, i shpallur tashmë Udhëheqësi i ri Suprem i Iranit.
Raportimet thonë se Mojtaba Khamenei ndodhej pranë të atit më 28 shkurt, kur streha e tyre u godit nga raketa amerikane dhe izraelite. Sipas këtyre raportimeve, ai mbeti i plagosur dhe që prej asaj kohe nuk është shfaqur më në publik.
Pas ceremonisë në Teheran, trupi i Ali Khameneit pritet të dërgohet në Irak, ku do të zhvillohen homazhe në qytetet e shenjta shiite, Qerbela dhe Naxhaf. Më pas, ai do të prehet në qytetin e shenjtë të Qomit, më 9 korrik.
Presidenti iranian Masoud Pezeshkian u ka bërë thirrje qytetarëve “të çdo kombësie, feje, bindjeje dhe preference politike” që të marrin pjesë në funeral, duke e përshkruar praninë e tyre si një mesazh me peshë për komunitetin ndërkombëtar.
“Prania juaj masive do të jetë një përgjigje vendimtare ndaj logjikës së terrorizmit, dhunës dhe taktikave të frikësimit, si dhe një mesazh i qartë për botën se populli iranian qëndron i bashkuar në mbrojtje të pavarësisë dhe dinjitetit të tij”, deklaroi Pezeshkian.
Shtyrja e varrimit ka ngjallur vëmendje, duke qenë se në traditën myslimane të ndjerët zakonisht varrosen brenda një periudhe të shkurtër. Autoritetet iraniane kanë hedhur poshtë pretendimet se trupi është varrosur përkohësisht, duke theksuar se ai është ruajtur sipas rregullave të fesë islame.
Qeveria iraniane synon që këtë ceremoni ta paraqesë si një çast të unitetit kombëtar, të zisë së përbashkët dhe të qëndresës përballë presioneve të jashtme. Emblema zyrtare e funeralit paraqet një grusht të shtrënguar të Ajatollah Khameneit, të shoqëruar me sloganin: “Ne duhet të ngrihemi”.
Ceremonitë pritet të përdoren edhe si një shfaqje e ndikimit rajonal të Iranit dhe e lidhjeve të tij me komunitetet shiite. Edhe në Irak janë planifikuar ngjarje përkujtimore në shkallë të gjerë, në një vend ku jeton një popullsi e madhe shiite dhe veprojnë milici të mbështetura nga Teherani.
Organizimi i gjithë kësaj skeme përbën një sfidë të konsiderueshme logjistike. Autoritetet kanë parashikuar hapësira të mëdha parkimi në periferi të Teheranit, ku vizitorët do të lënë automjetet e tyre për të vijuar më pas me autobusë drejt qendrës së qytetit. Kazermat dhe shkollat janë vënë në dispozicion për të strehuar pelegrinët që do të vijnë nga e gjithë vendi.
Në të njëjtën kohë, në kompleksin Grand Mosalla po vazhdojnë punimet për ngritjen e platformave dhe për sistemimin e hyrjeve dhe daljeve, me synimin për të administruar fluksin e madh të pjesëmarrësve që pritet në ceremoninë mortore.
