Edicioni i sivjetshëm i Festivalit Ndërkombëtar të Filmit në Venecia ngre siparin këtë të mërkurë, duke vënë në qendër të vëmendjes yllin e Hollivudit, George Clooney. Aktori 65-vjeçar do të marrë çmimin për arritje jetësore që në mbrëmjen inauguruese, një nderim për kontributin e tij të gjatë në kinematografi.
Të lidhura
None found
I pranishëm shpesh në tapetin e kuq të këtij festivali, Clooney pritet të sjellë shkëlqim në një edicion ku studiot kryesore hollivudiane kanë zgjedhur të mungojnë. Ceremonia e hapjes deri më 12 shtator do të shoqërohet me filmin “Ink” të regjisorit Danny Boyle, i cili rrëfen ngjitjen e Rupert Murdoch në majat e industrisë mediatike britanike.
Gjithashtu, në program përfshihen produksione për Elon Musk dhe rikthimin e grupit Oasis, ndërsa vëllezërit Liam dhe Noel Gallagher pritet të defilojnë në tapetin e kuq. Penelope Cruz dhe Javier Bardem sjellin trilerin psikologjik “Bunker”, kurse John Malkovich dhe Sam Rockwell luajnë dy agjentë të çuditshëm të CIA-s në “Wild Horse Nine”.
Në garën për “Luanin e Artë” përfshihet dokumentari “Naza”, i cili trajton vrasjen e civilëve në Gaza nga forcat izraelite. Drejtori artistik Alberto Barbera deklaroi se festivali ka për detyrë të trajtojë përmes kinemasë konfliktet në Gaza dhe Lindjen e Mesme.
Një tjetër temë që pritet të mbizotërojë gjatë këtij edicioni është inteligjenca artificiale. Për herë të parë, në Venecia do të shfaqet një dokumentar i prodhuar tërësisht me këtë teknologji. “Be Brave”, me regji të italianit Francesco Carrozzini, tregon historinë e themeluesit të markës “Diesel”, Renzo Rosso. Barbera pranoi se teknologjia e re sjell kërcënime për vendet e punës, të drejtat e autorit dhe figurën e artistëve, por nënvizoi se ajo u hap rrugë regjisorëve për të realizuar projekte që më parë dukeshin të paarritshme.
Festivali do të mbajë edhe një simpozium ndërkombëtar mbi ndikimin e inteligjencës artificiale në industrinë filmike, ku ndër të ftuarit do të marrë pjesë edhe George Clooney.
