Neil, foka elefant që u shndërrua në fenomen në rrjetet sociale pasi bllokoi rrugë, dëmtoi tabela dhe mblodhi qindra kureshtarë në Tasmani, është rikthyer në det pas disa javësh të kaluara në breg.
Sipas njoftimit të Departamentit të Burimeve Natyrore dhe Mjedisit të Tasmanisë, kthimi i Neil në det u krye pa probleme.
Të lidhura
None found
“Neil u kthye shëndoshë e mirë në det mbrëmë. Kjo është sjellja e saj normale dhe pritej”, thanë autoritetet në deklaratën e tyre, duke shtuar se nuk përjashtohet mundësia që ajo të dalë sërish në breg në ditët e ardhshme.
Neil është një fokë elefant pesëvjeçare me peshë rreth një ton, që del në breg dy herë në vit në jug të Tasmanisë për të pushuar dhe për të ndërruar qimet. Gjatë kësaj periudhe, videot ku ajo rrëzonte tabela e shtylla dhe shtrihej për banjë dielli në rrugë u përhapën me shpejtësi, duke marrë miliona shikime në rrjetet sociale.
Interesi i madh i publikut i detyroi autoritetet të vendosnin masa të veçanta sigurie. Vizitorëve iu kërkua të qëndronin të paktën 20 metra larg kafshës, ndërsa qentë duhej të mbaheshin në një distancë minimale prej 50 metrash. Po ashtu, u bë e ditur se eutanazia do të merrej në konsideratë vetëm si zgjidhja e fundit, në rast se siguria publike nuk do të garantohej.
Autoritetet thanë se pati edhe raste kur persona iu afruan Neil-it me fëmijë të vegjël për të bërë fotografi ose i lanë ushqim, veprime që u cilësuan të rrezikshme.
Për menaxhimin e situatës, këshilli lokal vendosi roje sigurie 24 orë në ditë dhe ndryshoi përkohësisht qarkullimin në zonë, ndërsa po llogarit edhe dëmet e shkaktuara nga foka.
Ekspertët e jetës së egër sqarojnë se goditjet e Neil ndaj tabelave, shtyllave dhe objekteve të tjera janë pjesë e sjelljes tipike të fokave elefant të kësaj moshe, të cilat zakonisht luajnë dhe “sfidojnë” njëra-tjetrën në këtë mënyrë.
Neil ka lindur në jug të Tasmanisë dhe konsiderohet një nga këlyshët e parë të fokës elefant të lindur në këtë zonë, pasi popullata e kësaj specieje u zhduk në fillim të shekullit të 19-të si pasojë e gjuetisë. Aktualisht, foka elefant renditet si specie e prekshme në Australi.
“Ne do të vazhdojmë ta monitorojmë, por tani tabelat dhe konet e trafikut të Tasmanisë mund të marrin frymë të qeta. Falënderojmë të gjithë ata që e trajtuan Neil me respekt dhe kujdes gjatë kohës që ishte në tokë”, deklaroi kryeministri i Tasmanisë, Jeremy Rockliffe.
