“Si golashënues, do të thosha se jam ndër më të mirët, por mendoj se Harry Kane dhe Kylian Mbappé kanë shënuar më shumë gola se unë këtë sezon, kështu që statistikisht, jo, nuk jam më i miri. Ky është realiteti”.
Kështu foli Erling Haaland pasi realizoi dy herë kundër Irakut, në suksesin 4-1 të Norvegjisë.
Të lidhura
None found
Megjithatë, tabloja që japin shifrat e plota është krejt tjetër. Haaland po e shtyn produktivitetin e tij përpara në nivele që duken jashtë normales.
Sulmuesi i Manchester Cityt ishte vendimtar edhe në triumfin 2-1 të Norvegjisë ndaj Brazilit në raundin e 16-të të Kupës së Botës, ku shënoi sërish dy gola dhe e bëri edhe më të fortë garën për Këpucën e Artë.
Në krye të renditjes së golashënuesve të turneut qëndron Lionel Messi me tetë gola, ndërsa Haaland dhe Kylian Mbappe ndajnë nga shtatë secili. Pas tyre vjen Harry Kane me gjashtë realizime.
Mesatare unike me Norvegjinë
Për herë të parë në historinë e Kupës së Botës, në një edicion të vetëm tre lojtarë kanë kaluar kufirin e shtatë golave.
Por ajo që bie edhe më shumë në sy është rendimenti i Haalandit me fanellën e Norvegjisë. Ai ka shënuar 62 gola në 54 ndeshje me kombëtaren, çka përkthehet në një mesatare prej 1.14 golash për takim.
Në historinë e futbollit, asnjë lojtar që ka arritur të paktën 60 gola me ekipin përfaqësues nuk ka mbajtur një ritëm të tillë realizimi.
Më pranë kësaj shifre kanë qenë Ferenc Puskás, me 84 gola në 85 ndeshje për Hungarinë, si dhe Kunishige Kamamoto, me 75 gola në 76 paraqitje për Japoninë. Të dy e kanë mbyllur me mesatare 0.99 gola për ndeshje.
Më pas vijnë Ali Mabkhout me 0.74 gola për ndeshje, Ali Daei me 0.73, Romelu Lukaku me 0.71 dhe Harry Kane me 0.71.
Edhe Cristiano Ronaldo dhe Lionel Messi, dy emrat më produktivë në historinë e futbollit në nivel kombëtaresh, mbeten dukshëm pas tij sa i takon mesatares. Ronaldo ka 146 gola, Messi 124, ndërsa mesatarja e tyre është respektivisht 0.63 dhe 0.61 gola për ndeshje.
Dominim statistikor edhe me klubet
I njëjti trend shihet edhe në karrierën e tij me klubet. Haaland ka regjistruar 359 gola në 418 ndeshje gjithsej, duke mbajtur një mesatare prej 0.85 golash për ndeshje. Ai mbetet ndër shumë pak sulmues të epokës moderne që i afrohen vazhdimisht raportit një gol për ndeshje.
Te Salzburgu, ku realizoi 29 gola në 27 paraqitje, ai e kaloi këtë ritëm. Te Borussia Dortmundi shënoi 86 gola në 87 ndeshje, ndërsa me Manchester City ka arritur në 162 gola në 198 paraqitje.
Nëse vendoset përballë emrave më të mëdhenj të viteve të fundit, Haaland vazhdon të dalë në avantazh.
Lionel Messi ka 918 gola në 1,160 ndeshje dhe një mesatare karriere prej 0.79 golash për ndeshje. Kylian Mbappé numëron 432 gola në 574 ndeshje, me mesatare 0.75.
Cristiano Ronaldo, golashënuesi më i mirë në historinë e futbollit, ka shënuar 971 gola në 1,323 paraqitje dhe ka një mesatare prej 0.73 golash për ndeshje.
Robert Lewandowski ka realizuar 718 gola në 1,036 ndeshje, me mesatare 0.69, ndërsa Harry Kane ka 527 gola në 766 paraqitje, me mesatare 0.68.
“Cyborgu” para provës ndaj Anglisë
Me 62 gola të shënuar për Norvegjinë, Haaland është tashmë në të njëjtin nivel me Zlatan Ibrahimovicin si golashënuesi më i mirë i kombëtareve nordike.
Dallimi mes tyre është i madh te numri i ndeshjeve: Haaland e arriti këtë total në vetëm 54 sfida, ndërsa Ibrahimovic kishte pasur nevojë për 122 paraqitje.
“Nuk e di si ia dal, por nëse kam një ose dy raste, ato zakonisht përfundojnë me gol. Po filloj ta kuptoj, mendoj, se është një dhuratë nga Zoti që topi përshtatet në mënyrë të përkryer, pikërisht pranë shtyllës dhe të gjitha këto. Është çmenduri”, deklaroi Haaland pas dopietës ndaj Brazilit.
Për të përdorur një krahasim që Fernando Hierro dikur e bënte për Raulin, Haaland është një “Ferrari” që po rrezikon t’i lërë të gjithë pas.
Ndalesa e radhës është Anglia në çerekfinale. Norvegjia synon të vijojë rrugëtimin e saj historik në Kupën e Botës, ndërsa Haaland kërkon të shtojë të tjerë gola në një kompeticion ku tashmë është bërë një nga protagonistët kryesorë.
“Ne vazhdojmë. Shpresoj që të gjithë të rinjtë, kur të rriten pak më shumë, do ta konsiderojnë të luajturin për Norvegjinë si krenarinë më të madhe që kanë ndier ndonjëherë në jetën e tyre. Kjo është një nga ditët më të pabesueshme në historinë e futbollit norvegjez”, përfundoi Haaland.
