Një valë e fortë të nxehti ka përfshirë ditët e fundit mbarë Evropën.
Të martën, pothuajse i gjithë territori i Spanjës u vu nën alarm për temperatura ekstreme, ndërsa në disa zona të jugut dhe veriut u aktivizua niveli më i lartë i paralajmërimit.
Të lidhura
None found
Agjencia Kombëtare e Meteorologjisë (AEMET) shpalli alarm të kuq për zonat pranë Kordobës në jug, Bilbaos në veri dhe për disa pjesë të rajonit të Kantabrisë, duke sinjalizuar “rrezik të jashtëzakonshëm”. Në disa pjesë të Vendit Bask, afër kufirit me Francën, termometri pritet të ngjitet deri në 40 gradë Celsius, një situatë e pazakontë për atë rajon.
Në të njëjtën kohë, Franca shënoi natën më të nxehtë që prej nisjes së matjeve meteorologjike në vitin 1947. Sipas agjencisë kombëtare të motit, temperatura mesatare kombëtare gjatë natës arriti në 21.6 gradë Celsius, duke tejkaluar rekordin e mëparshëm të regjistruar në vitin 2019.
Temperaturat e larta po ushtrojnë ndikim edhe mbi tregjet energjetike në Evropë. Përdorimi i gjerë i kondicionerëve ka shtuar ndjeshëm kërkesën për energji elektrike, ndërsa ulja e shpejtësisë së erës ka kufizuar prodhimin nga burimet e rinovueshme.
Gjendja është rënduar më tej edhe nga ndërprerja e përkohshme e një centrali të madh bërthamor në Francë, si pasojë e temperaturave të larta që kanë kufizuar furnizimin me ujë ftohës për reaktorët. Kompania EDF bëri të ditur se centrali pritet të kthehet në funksion javën e ardhshme.
Si rrjedhojë, çmimet e energjisë janë ngjitur në nivele shumëvjeçare. Në Gjermani, tregu më i madh energjetik në Evropë, çmimi me shumicë pritet të arrijë në 545.51 euro për megavat-orë, niveli më i lartë që nga qershori i vitit 2024. Në Francë, ai pritet të shkojë në 268.67 euro për megavat-orë, ndërsa në Mbretërinë e Bashkuar në afro 230 paund për megavat-orë.
Vala e të nxehtit po zhvendoset tashmë drejt Evropës Lindore. Në Poloni, temperaturat parashikohet të arrijnë deri në 38 gradë Celsius në Varshavë dhe 41 gradë në rajonin e Silezisë së Poshtme, duke vënë në rrezik rekordet historike të temperaturave.
Autoritetet polake u kanë rekomanduar qytetarëve të kufizojnë qëndrimin jashtë, të pijnë sa më shumë ujë dhe të shmangin ekspozimin e zgjatur në diell.
Nga ana tjetër, shërbimet zjarrfikëse në Mbretërinë e Bashkuar kanë paralajmëruar për rritje të rrezikut të zjarreve në pyje dhe kanë kërkuar të shmangen zjarret e kontrolluara, barbeque-të dhe aktivitete të tjera që mund të shkaktojnë flakë në kushtet e motit të nxehtë dhe të thatë.
Ekspertët e klimës theksojnë se efektet e ndryshimeve klimatike po bëhen gjithnjë e më të dukshme. Sipas organizatave mjedisore britanike, temperaturat ekstreme po ushtrojnë presion mbi sistemin shëndetësor, transportin publik dhe jetën e përditshme të qytetarëve, duke e bërë edhe më të domosdoshme marrjen e masave urgjente për përshtatje.
Në Londër, stuhitë e forta që erdhën pas temperaturave të larta sollën përmbytje të menjëhershme dhe ndërprerje të mëdha në rrjetin e transportit publik. Brigada e Zjarrfikësve të Londrës njoftoi për qindra thirrje emergjente gjatë natës, ndërsa autoritetet u kërkuan qytetarëve të shmangin zonat e prekura nga përmbytjet.
