Londra ka shpallur një paketë të re sanksionesh kundër Rusisë, duke futur në listë shtatë persona dhe dy institute kërkimore ruse, që sipas autoriteteve britanike lidhen me zhvillimin dhe prodhimin e armëve kimike të përdorura në helmimin e disidentit rus Alexei Navalny dhe të britanikes Dawn Sturgess.
Të lidhura
None found
Ministria e Jashtme britanike bëri të ditur se individët dhe institucionet e goditura nga masat kanë marrë pjesë në kërkimin shkencor, zhvillimin dhe prodhimin e agjentëve nervorë vdekjeprurës, mes tyre Novichok dhe epibatidina. Sipas pretendimeve të Londrës, këto substanca janë përdorur në helmimin e Navalnyt dhe Sturgess.
Në paketën e sanksioneve përfshihen instituti kërkimor SC Signal dhe instituti kërkimor mjekësor GNIII VM. Autoritetet britanike thonë se shtatë personat e sanksionuar mbajnë pozicione drejtuese në këto dy institucione dhe dyshohet se kanë pasur rol thelbësor në programe kërkimore që lidhen me agjentë kimikë.
Në muajin shkurt, Britania e Madhe, së bashku me Suedinë, Francën, Gjermaninë dhe Holandën, akuzuan Moskën se kishte përdorur ndaj Alexei Navalnyt një toksinë të rrallë, epibatidinë. Kundërshtari i njohur i Kremlinit vdiq në vitin 2024 në burg, në rrethana që vijojnë të shkaktojnë debat dhe reagime ndërkombëtare.
Dawn Sturgess, 44 vjeçe nga Britania, humbi jetën në korrik të vitit 2018 pasi u ekspozua ndaj substancës Novichok. Ajo konsiderohet një viktimë anësore e sulmit të kryer ndaj ish-agjentit të dyfishtë rus Sergei Skripal dhe vajzës së tij Yulia në Salisbury të Anglisë. Skripalët arritën t’i mbijetonin helmimit, por Sturgess vdiq pasi ra në kontakt me neurotoksinën që ishte gjetur në një shishe të hedhur.
Ngjarja në Salisbury shkaktoi një përplasje të fortë diplomatike midis Londrës dhe Moskës, e cila u pasua me dëbime reciproke diplomatike dhe përkeqësim të marrëdhënieve mes dy shteteve.
“Përdorimi i përsëritur i armëve kimike nga Rusia përbën një shkelje flagrante të së drejtës ndërkombëtare dhe një kërcënim të menjëhershëm për sigurinë globale”, deklaroi ministrja e Brendshme britanike, Yvette Cooper.
Njoftimi i autoriteteve britanike vjen në prag të Samitit të NATO-s në Ankara, ku lufta në Ukrainë dhe siguria euroatlantike pritet të jenë ndër temat kryesore të diskutimeve.
Sipas Ministrisë së Jashtme britanike, që prej nisjes së pushtimit rus të Ukrainës, Mbretëria e Bashkuar ka vendosur sanksione ndaj më shumë se 3,400 individëve, kompanive dhe organizatave të lidhura me Rusinë.
