Presidentja e Komisionit Europian, Ursula von der Leyen, dhe presidenti i Këshillit Europian, António Costa, reaguan ashpër ndaj ceremonisë së varrimit të Ratko Mlladiçit në Beograd. Ata i përshkruan si tronditëse pamjet e përcjelljes së “Kasapit të Ballkanit” me nderime ushtarake.
Të lidhura
None found
Përmes një deklarate të publikuar sot në platformën X, dy drejtuesit e institucioneve të BE-së shprehën “shok” për glorifikimin e Mlladiçit dhe kritikuan pjesëmarrjen e zyrtarëve të lartë serbë në funeralin e tij. Sipas tyre, Mlladiçi ishte një kriminel lufte i dënuar dhe përgjegjës për genocid, krime lufte dhe krime kundër njerëzimit. Von der Leyen dhe Costa lanë të kuptohej gjithashtu se një qëndrim i tillë i Serbisë dëmton perspektivën e saj për anëtarësim në Bashkimin Europian.
Trupi i 84-vjeçarit, i cili vdiq në Hagë ndërsa vuante dënimin me burgim të përjetshëm, u dërgua në Beograd me një avion shtetëror. Në kryeqytetin serb, atij iu bënë nderime nga një gardë ushtarake, pjesëtarë të ushtrisë dhe forcave të ndryshme të sigurisë, televizioni shtetëror dhe Kisha Ortodokse Serbe. Arkivoli u mbulua me flamurin e Serbisë.
Një ditë më herët, zëdhënësja kryesore e Komisionit Europian, Paula Pinho, u përball me reagime pas deklaratës së saj në konferencën e përditshme për shtyp, ku tha se BE-ja kishte dëgjuar për një funeral me nderime shtetërore, por se një ceremoni e tillë nuk kishte ndodhur. Ministrja e Jashtme e Bosnje Hercegovinës e cilësoi këtë deklaratë si turp për të gjithë BE-në, duke theksuar se pesë ministra të qeverisë serbe ishin ulur në rreshtin e parë, një krimineli lufte të dënuar iu dhanë nderime ushtarake dhe trupi i tij u transportua me avionin e qeverisë serbe.
Reagimi i përbashkët i Ursula von der Leyen dhe António Costës përforcon dënimin institucional të BE-së ndaj lartësimit të Mlladiçit. Sipas këtij qëndrimi, refuzimi i Serbisë për t’u përballur me një prej kapitujve më të errët të historisë europiane bie ndesh me vlerat themelore të anëtarësimit në BE. Më herët, Komisionerja për Zgjerimin, Marta Kos, anuloi vizitën e planifikuar në Serbi.
Ndërkohë, Aleksandar Vuçiç ka kërkuar zhvillimin e zgjedhjeve të parakohshme parlamentare në fund të tetorit. Qeveria serbe i ka propozuar atij shpërndarjen e Parlamentit dhe organizimin e zgjedhjeve, të cilat, nëse miratohen, duhet të shpallen brenda 72 orëve. Sipas mediave të huaja, Vuçiçi po përgatit një rokadë politike për të kaluar nga presidenca në postin e kryeministrit.
