Kryeministri në detyrë i Republikës së Kosovës, Albin Kurti, mori pjesë në ceremoninë e rihapjes së Galerisë Kombëtare të Kosovës, së bashku me ushtruesen e detyrës së Presidentes të Republikës së Kosovës, Albulena Haxhiu.
Të lidhura
None found
Në fjalën e tij hyrëse, Kurti u shpreh se rikthimi në funksion i këtij institucioni qendror të artit pamor dëshmon qartë se kultura nuk mund të ecë përpara pa infrastrukturë të përshtatshme, ashtu siç arti nuk mund të ruhet, shfaqet dhe zhvillohet pa ambiente të denja për krijim, ekspozim dhe konservim.
Ai tha se investimi prej më shumë se 1.6 milion eurosh tregon se ndërtimi dhe modernizimi i infrastrukturës kulturore nuk përbën luks, por një nevojë të domosdoshme. Sipas tij, projekte të tilla kërkojnë kohë, planifikim dhe përkushtim, ndaj rruga drejt përfundimit të tyre shpesh duket e gjatë.
Kurti nënvizoi gjithashtu se objektet e kulturës nuk ndërtohen vetëm për kërkesat e së tashmes, por për brezat që vijnë, për artistët e së ardhmes, për ruajtjen e kujtesës kolektive dhe për një shoqëri që kulturën e konsideron pjesë të zhvillimit të saj. Për këtë arsye, shtoi ai, çdo investim kapital në infrastrukturën kulturore është investim afatgjatë në identitetin, edukimin dhe zhvillimin e Republikës së Kosovës.
“Investimi në Galerinë Kombëtare nuk është thjesht investim në një ndërtesë, është investim në kujtesën tonë kolektive, në artistët tanë dhe në brezat që do të vijnë pas nesh”, u shpreh ai.
Fjala e plotë e kryeministrit në detyrë Kurti:
E nderuara ushtruese e detyrës së Presidentes të Republikës së Kosovës, znj. Albulena Haxhiu,
E nderuara znj. Atifete Jahjaga, ish-Presidente,
E nderuara znj. Justina Shiroka- Pula, Kryetare e Akademisë së Shkencave dhe Arteve të Kosovës,
E nderuara Ministre e Kulturës dhe Turizmit, znj. Saranda Bogujevci,
E nderuara ushtruese e detyrës drejtore e Galerisë Kombëtare të Kosovë s, znj. Alisa Gojani Berisha,
E nderuara Hana Halili, kuratore e ekspozitës,
I nderuari z. Hajrulla Çeku, ministër i Arsimit dhe Shkencës, ka nisë aq punë të mira, saqë të gjitha frytet do t’i korrë Saranda tash,
Të nderuar shkëlqesi ambasadorë dhe përfaqësues të shteteve mike në Republikën e Kosovës,
Të nderuar përfaqësues të institucioneve kulturore,
Të nderuar artistë dhe artdashës,
Zonja dhe zotërinj,
Të nderuar të pranishëm,
Sot jemi mbledhur për të shënuar një moment të rëndësishëm për kulturën e Republikës së Kosovës: rihapjen e Galerisë Kombëtare të Kosovës, institucionit qendror të artit pamor në vendin tonë.
Kjo rihapje shënon përmbylljen e një procesi renovimi. Ajo është tregues i një bindjeje të fortë se kultura nuk zhvillohet pa infrastrukturë të denjë, sikurse arti nuk mund të ruhet, prezantohet e të zhvillohet pa hapësira të përshtatshme për krijim, ekspozim dhe konservim.
Ky investim në vlerë prej më shumë se 1.6 milion euro është provë se ndërtimi dhe modernizimi i infrastrukturës së skenës kulturore nuk është luks, por domosdoshmëri. Projekte të këtilla kërkojnë kohë, planifikim dhe përkushtim, prandaj shpesh rruga deri te realizimi i tyre mund të duket e gjatë. Megjithëkëtë, koha e investuar në krijimin e hapësirave të qëndrueshme për kulturën është kohë e investuar në të ardhmen e vendit. Mund të thuhet pra që nuk kemi humbur kohë, por kemi fituar hapësirë për kohë të gjatë.
Objektet kulturore nuk ndërtohen vetëm për nevojat e sotme. Ato ndërtohen për brezat që vijnë, për artistët e së nesërmes, për ruajtjen e kujtesës sonë kolektive dhe për një shoqëri që e sheh kulturën si pjesë të zhvillimit të saj. Prandaj, çdo investim kapital në infrastrukturën kulturore është një investim afatgjatë në identitetin, edukimin dhe zhvillimin e Republikës së Kosovës.
Për shumë vite, institucionet tona kulturore kanë bartur barrën e mungesës së investimeve të nevojshme në objekte, depo, sisteme teknike dhe kushte profesionale të ruajtjes së trashëgimisë sonë kulturore. Prandaj, edhe investimi në Galerinë Kombëtare nuk është thjesht investim në një ndërtesë, është investim në kujtesën tonë kolektive, në artistët tanë dhe në brezat që do të vijnë pas nesh.
Projekti i renovimit ka përfshirë përmirësimin e tërësishëm të infrastrukturës së Galerisë, duke krijuar kushte bashkëkohore për ekspozim, ruajtje dhe menaxhim të koleksionit. Një komponent i rëndësishëm i këtij transformimi është edhe shtimi i rreth 400m² hapësirë të re depozituese, e ndërtuar sipas standardeve ndërkombëtare për konservimin dhe preservimin e veprave të artit, duke forcuar kapacitetet institucionale për ruajtjen dhe pasurimin e Koleksionit tonë Shtetëror.
Përmes investimeve kapitale në kulturë, ne po ndërtojmë kushte më të mira së bashku për punën e profesionistëve të fushës, po krijojmë hapësira më të sigurta për koleksionet shtetërore dhe po i japim mundësinë publikut tonë të ketë qasje në institucione bashkëkohore, që janë edhe të hapura edhe funksionale.
Kultura nuk është luks. Ajo është pjesë e zhvillimit shoqëror, ekonomik dhe demokratik të vendit. Një shtet i cili investon në kulturë investon në dijen, në kreativitetin dhe në identitetin e vet.
Prandaj, edhe përkushtimi ynë për forcimin e infrastrukturës kulturore do të vazhdojë. Galeria Kombëtare është një shembull i këtij vizioni. Ajo sot rikthehet me kushte më të mira, me kapacitete të zgjeruara dhe me mundësi më të mëdha për të ruajtur, studiuar dhe prezantuar artin e Kosovës.
Dua të falënderoj Ministrinë e Kulturës dhe Turizmit, ekipin e Galerisë Kombëtare, profesionistët, inxhinierët, punëtorët dhe të gjithë ata të cilët kontribuuan në realizimin e këtij projekti. Ky është rezultat i punës së përbashkët të heshtur, të vendosur dhe i besimit se institucionet publike mund të ndërtohen me standarde të larta.
Uroj që kjo galeri e rinovuar të jetë një hapësirë e gjallë e dialogut, e pasionit dhe e gëzimit e reflektimit dhe e krijimtarisë; në një vend, pra, ku arti takohet me publikun dhe ku kultura vazhdon t’i ndërtojë urat më të forta midis njerëzve. E ashtu qysh kemi thënë ngahera me ish-ministrin e Kulturës, tash ministri i Arsimit, përpjekja jonë më e madhe është që ta bëjmë sa më shumë kulturë artistike dhe njëkohësisht ta bëjmë sa më shumë artin kulturë. Andaj, ky është vendi i duhur për ta bërë urimin kryesor, atë të rihapjes së Galerisë Kombëtare të Kosovës dhe për t’ju dëshiruar të gjithë artistëve dhe dashamirëve të artit suksese gjithnjë më të mira e më të mëdha në këtë kapitull të ri, të cilin po e fillojmë sonte.
