Kryetari i Partisë Demokratike të Kosovës, Bedri Hamza, deklaroi pak para takimit në Kuvendin e Kosovës me liderin e Lëvizjes Vetëvendosje, Albin Kurti, se diskutimi duhet të nisë me prioritetet dhe jo me ndarjen e posteve.
Të lidhura
None found
I pyetur nëse do të ketë një zgjidhje për krijimin e institucioneve të reja, Hamza veçoi si çështje kryesore partneritetin me aleatët, si dhe rritjen e pagave dhe pensioneve.
“Fillimisht për prioritete se unë kam garuar me një program dhe kam garuar me disa prioritete. Nuk kam garuar për me i pas katër-pesë vetëm ministra, për me pas këtë dhe atë pozicion. Kam garuar me pas ambient të mirë për biznesin, me pas partneritet me aleatë dhe miqtë tanë dhe me i rrit pagat dhe pensionet”, tha ai.
Ndërkohë, Kurti për të premten ka ftuar në takim edhe kryetarin e LDK-së, Lumir Abdixhiku, si dhe kryetarin e Aleancës, Ardian Gjini. Ky i fundit e ka refuzuar ftesën, teksa ka renditur disa nga kërkesat e tij, mes tyre edhe gazin amerikan për ta bërë kuorumin për presidentin.
Të mërkurën, KQZ certifikoi rezultatet e zgjedhjeve të 7 qershorit. Sipas këtyre rezultateve, Lëvizja Vetëvendosje doli partia e parë me 47.13%, që përkthehet në 53 ulëse në Kuvend. Partia Demokratike e Kosovës u rendit e dyta me 19.44%, apo 22 deputetë. Lidhja Demokratike e Kosovës fitoi 16.69% dhe 18 ulëse, ndërsa Aleanca mori 6.74% dhe shtatë ulëse. Komunitetet joshumicë, në anën tjetër, kanë siguruar 20 ulëse.
