Autoritetet lokale në shtetin meksikan të Veracruz kanë njoftuar se një deputet i Kongresit federal është gjetur i pajetë, me një plagë të shkaktuar nga arma e zjarrit.
Të lidhura
None found
Viktima ishte Zeniazen Escobar, 42 vjeç. Trupi i tij u zbulua në sediljen e shoferit, brenda makinës së parkuar në anë të rrugës. Pranë tij u gjet edhe një armë zjarri.
Ricardo Auet, ministër i Brendshëm i Veracruz, konfirmoi se deputeti kishte humbur jetën si pasojë e një të shtëne me armë, ndërsa sqaroi se në këtë fazë nuk mund të bëheshin publike detaje të tjera.
“Vdekja erdhi për shkak të një të shtëne me armë zjarri, nuk mund të japim më shumë detaje në këtë fazë”, deklaroi Auet. Ai nuk saktësoi nëse rasti po hetohej si vrasje apo vetëvrasje.
Escobar kishte përvojë të gjatë në administratën publike. Përpara angazhimit politik, ai kishte punuar si mësues, kishte drejtuar një sindikatë dhe kishte mbajtur postin e ministrit të Arsimit në Veracruz gjatë periudhës 2018-2021.
Mandati i tij si deputet në Kongresin federal të Meksikës nisi pas zgjedhjes në shtator të vitit 2024.
Veracruz konsiderohet një nga shtetet më të dhunshme në Meksikë. Prej vitesh, veprimtaria e grupeve kriminale të lidhura me trafikun e drogës ka sjellë një numër të madh incidentesh të dhunshme në këtë zonë.
Hetimet vijojnë për të sqaruar plotësisht rrethanat në të cilat humbi jetën ligjvënësi.
