Administrata e Donald Trump synon të marrë javën e ardhshme mbështetjen e drejtuesve ekonomikë të 20 ekonomive më të mëdha në botë për një paketë politikash që do të fokusohet te nxitja e rritjes, ulja e çekuilibrave globalë dhe përballimi i problemeve që lidhen me borxhin sovran.
Të lidhura
None found
Njëkohësisht, Uashingtoni pritet t’u kërkojë vendeve të G20 të shkëpusin marrëdhëniet ekonomike dhe financiare me Iranin, si pjesë e përpjekjes amerikane për ta izoluar Teheranin në planin ekonomik.
Takimi do të mbahet në Asheville të Karolinës së Veriut, më 31 gusht dhe 1 shtator. Në të do të marrin pjesë ministrat e financave dhe guvernatorët e bankave qendrore të vendeve të G20, të cilët do të priten nga sekretari i Thesarit i SHBA-së, Scott Bessent.
Një zyrtar i lartë i Thesarit amerikan bëri të ditur se Irani do të jetë ndër çështjet kryesore të bisedimeve. Sipas tij, administrata Trump do të përpiqet të bindë vendet anëtare të ndërpresin lidhjet ekonomike me Teheranin, ndërsa ato që vijojnë të bëjnë biznes me Iranin mund të përballen me masa ndëshkuese.
Mbledhja zhvillohet në një moment kur presioni amerikan ndaj Iranit është intensifikuar. Shtetet e Bashkuara kanë zgjeruar sanksionet dhe kanë paralajmëruar se vendet apo kompanitë që ruajnë marrëdhënie ekonomike me Teheranin mund të goditen nga sanksione dytësore.
Axhenda e G20 do të përfshijë gjithashtu rritjen e ekonomisë globale, çekuilibrat tregtarë, borxhin sovran dhe forcimin e zinxhirëve të furnizimit, veçanërisht në fushat strategjike të energjisë dhe burimeve kritike.
