Një total prej 28 linjash të reja ajrore direkte është shtuar nga aeroportet e Maqedonisë, duke zgjeruar alternativat e udhëtimit për qytetarët dhe duke e afruar vendin me vizitorët ndërkombëtarë, njoftoi partia në pushtet, OBRM-PDUKM.
Të lidhura
None found
Aeroporti Ndërkombëtar i Shkupit tashmë ofron fluturime direkte për në Paris, Barcelonë, Lion, Amsterdam, Lubjanë, Madrid, Stokholm, Këln, Bari, Pragë, Larnakë, Napoli, Budapest, Alghero dhe Palermo.
Ndërsa nga Aeroporti i Ohrit janë vendosur linja të reja drejt Stambollit, Bazelit, Larnakës, Madridit, Shtutgartit, Barit, Stokholmit, Katovicës, Vroclavit, Milanos, Bratislavës dhe Vjenës.
OBRM-PDUKM vlerëson se ky zgjerim do të ketë ndikim të drejtpërdrejtë në ekonomi, përmes nxitjes së turizmit, veçanërisht në Ohër. Sipas partisë, lidhjet e reja do t’u mundësojnë gjithashtu kompanive vendase komunikim më të lehtë me partnerët dhe tregjet ndërkombëtare.
Partia në pushtet deklaron se shtimi i destinacioneve ajrore është pjesë e politikave të Qeverisë për të krijuar më shumë mundësi udhëtimi dhe për të forcuar lidhjet e Maqedonisë së Veriut me Evropën dhe botën.
