Një mjet lundrues tregtar është goditur nga një predhë me origjinë të panjohur në Ngushticën e Hormuzit, bëri të ditur Agjencia Britanike për Operacionet Tregtare Detare.
Të lidhura
None found
Ngjarja u regjistrua rreth 37 kilometra në verilindje të qytetit Al Khasab, në Oman. Autoritetet nuk kanë raportuar deri tani persona të plagosur apo dëme të mëdha në anije, ndërsa shkaqet dhe rrethanat e incidentit mbeten të paqarta.
Goditja ndodhi në një periudhë kur situata në Gjirin Persik vazhdon të jetë e tensionuar. Presidenti amerikan Donald Trump ka deklaruar se “janë duke u zhvilluar negociata të reja me Iranin”, por Teherani mohon që të ketë nisur bisedime me Shtetet e Bashkuara.
Zyrtarët iranianë thonë se komunikimi diplomatik po zhvillohet vetëm me Omanin dhe synon të sigurojë kalim të mbrojtur për anijet në Ngushticën e Hormuzit, një prej korridoreve detare më të rëndësishme për transportin ndërkombëtar të naftës.
Incidenti i fundit ka rritur më tej shqetësimet lidhur me sigurinë e lundrimit në këtë zonë. Sipas burimeve ndërkombëtare, disa shtete të Gjirit po vlerësojnë mundësinë e ndërtimit të një tubacioni të ri energjetik, përmes të cilit nafta do të mund të eksportohej pa kaluar në Ngushticën e Hormuzit, në rast mbylljeje ose përshkallëzimi të konfliktit.
