Një kthesë e re ka shënuar hetimet për vdekjen e gazetarit të pavarur italian Luigi Esposito, të cilin të gjithë e thërrisnin “Luca”. Forcat e karabinierëve kanë vënë në pranga një shtetas tunizian 26-vjeçar me emrin Ridha Rahmoumi, i dyshuar si përgjegjës për krimin.
Të lidhura
None found
I riu u zbulua në një strukturë rurale të braktisur pranë Ebolit, në territorin e Salernos. Pas ndalimit, ai u dërgua në zyrat e policisë për t’iu nënshtruar seancave të marrjes në pyetje nga grupi hetimor.
Gjatë inspektimit të ambientit që dyshohet se shërbente si strehë, uniformat blu zbuluan objekte vetjake të viktimës, përfshirë kartat e tij bankare. Këto elemente konsiderohen nga autoritetet si të dhëna kyçe për të rindërtuar se si kanë rrjedhur ngjarjet.
Burime nga shtypi italian bëjnë me dije se gjatë pyetjeve fillestare, personi i shoqëruar ka dhënë disa shpjegime, por përmbajtja e tyre nuk është zbuluar ende për opinionin publik. Specialistët po vazhdojnë punën për të ndriçuar shkakun dhe kontekstin e plotë të vrasjes.
Hipotezat fillestare të prokurorisë sugjerojnë se Esposito dhe Rahmoumi mund të kenë rënë në kontakt në mënyrë private dhe një prej pistave që po hetohet është ajo e një takimi me karakter intim. Për këtë qëllim, celulari i gazetarit është marrë në cilësinë e provës dhe po ekzaminohet me kujdes për të gjurmuar bisedat e tij të fundit.
Në mungesë të konfirmimeve zyrtare, disa thashetheme të pabazuara kanë filluar të qarkullojnë në mediat lokale lidhur me aspekte të jetës personale të gazetarit. Hetimi po ecën nën mbikëqyrjen e Prokurorisë së Salernos dhe pritet që informacionet zyrtare të bëhen publike sapo të përmbyllen hapat e parë proceduralë.
Forcat e rendit janë ende duke punuar për të përcaktuar me siguri absolut nëse 26-vjeçari i ndaluar është ekzekutuesi i krimit dhe cili ishte zinxhiri i rrethanave që solli fundin tragjik të jetës së gazetarit.
