Presidenti i Ukrainës, Volodymyr Zelensky, ka bërë të ditur se Mykhailo Fedorov, ministri i Mbrojtjes që u shkarkua prej tij dy ditë më parë, do të vijojë të jetë pjesë e ekipit presidencial. Sipas tij, përgjegjësitë e reja të Fedorovit do të njoftohen në një moment të mëvonshëm.
Të lidhura
None found
Ky qëndrim u shpreh pasi deputetët votuan për pjesën më të madhe të emërimeve në kabinetin e ri qeveritar, ndërsa postet e ministrit të Mbrojtjes dhe ministrit të Punëve të Jashtme mbetën pa u miratuar.
“Gjatë kohës së luftës, presidenti nuk duhet të jetë ai që merr vendime në një situatë të tillë. Do të doja të shihja më shumë unitet. Palët nuk kanë arritur ta gjejnë atë, dhe problemi nuk qëndron vetëm te partitë, por edhe te unë”, deklaroi Zelensky.
Kreu i shtetit ukrainas tha se e pranon përgjegjësinë për zhvillimet politike dhe se nuk ka ndërmend t’i largohet asaj.
“Unë nuk po e heq përgjegjësinë nga vetja. Fedorov do të mbetet në ekipin tim, por roli i tij i ri do të bëhet i ditur më vonë”, shtoi ai.
Riorganizimi i qeverisë ukrainase ndodh në një periudhë kur Ukraina vazhdon përballjen me agresionin rus, si edhe me vështirësi të konsiderueshme në mbrojtje, ekonomi dhe bashkërendimin e ndihmës ndërkombëtare. Zelensky e largoi Mykhailo Fedorovin pas një takimi me drejtuesit ushtarakë. Ky vendim shkaktoi reagime në rrethet politike dhe ushtarake, duke hapur diskutime për mbikëqyrjen e mbrojtjes së Ukrainës kundër pushtimit të nisur nga Rusia. Vendimi u pasua edhe me protesta në rrugët e shumë qyteteve ukrainase.
35-vjeçari, i njohur për aftësitë e tij në teknologji, kishte drejtuar nismat për digjitalizimin e administratës shtetërore dhe kishte nxitur inovacionin në përdorimin e dronëve si një armë me rëndësi në luftë.
