Në Republikën Demokratike të Kongos, epidemia e Ebolës po zgjerohet me shpejtësi, duke e çuar numrin e të infektuarve të konfirmuar mbi 2 mijë.
Të lidhura
None found
Të dhënat e autoriteteve shëndetësore të vendit tregojnë se që nga shpallja e epidemisë më 15 maj, laboratorët kanë konfirmuar 2,124 raste. Deri tani, virusi ka marrë 828 jetë.
Organizata Botërore e Shëndetësisë ka shprehur shqetësim për ritmin e përhapjes së sëmundjes. Drejtori i OBSH-së, Tedros Adhanom Ghebreyesus, ka thënë se ky shpërthim po avancon më shpejt krahasuar me episodet e mëparshme të virusit në këtë shtet.
Sipas tij, pragu prej 2 mijë rastesh të konfirmuara u arrit brenda dy muajsh, ndërsa epidemia e vitit 2018 kishte nevojitur më shumë se dhjetë muaj për të shënuar shifra të ngjashme.
Bëhet fjalë për shpërthimin e 17-të të Ebolës në Republikën Demokratike të Kongos. Ai lidhet me variantin Bundibugyo, për të cilin nuk ka aktualisht vaksinë ose trajtim të posaçëm.
Ebola është një sëmundje e rëndë që shkakton ethe hemorragjike. Në pesë dekadat e fundit, ajo ka shkaktuar mbi 15 mijë vdekje në Afrikë.
Shpërthimi me pasojat më të rënda në Republikën Demokratike të Kongos ndodhi nga viti 2018 deri në vitin 2020, kur u raportuan rreth 3,500 raste dhe rreth 2,300 viktima. Ndërkohë, autoritetet dhe organizatat ndërkombëtare po punojnë për të ndalur epideminë e re, e cila vlerësohet si një nga më shqetësueset e viteve të fundit.
