Lidhja Auto-Moto e Maqedonisë njofton se qarkullimi në të gjitha akset rrugore shtetërore po zhvillohet normalisht dhe mbi sipërfaqe të thata. Megjithatë, autoritetet bëjnë thirrje për vigjilencë të shtuar në disa segmente specifike, si në rrugën Katllanovë-Veles, aksin Mavrovë-Dibër-Strugë, si dhe në drejtimet Vinicë-Berovë dhe Koçan-Dellçevë. Në këto zona, që kalojnë nëpër lugina dhe gryka malore, rreziku nga rrëshqitjet e dheut mbetet i pranishëm.
Të lidhura
None found
Nga ana tjetër, fluksi i automjeteve në rrugët jashtë qendrave urbane ka shënuar rritje. Megjithatë, kjo nuk po shkakton vështirësi në qarkullim. Lidhja Auto-Moto e Maqedonisë u bën thirrje shoferëve që të përshtatin shpejtësinë me kushtet e rrugës, t’u binden sinjalistikave të trafikut dhe të drejtojnë mjetet me kujdes maksimal, sidomos në zonat me reliev të thyer.
Përsa u përket pikave të kalimit kufitar, nga ana e Maqedonisë nuk raportohet për radhë të gjata. Lëvizja e udhëtarëve dhe mjeteve po kryhet pa vonesa të konsiderueshme, si në hyrje ashtu edhe në dalje nga territori i vendit.
