Prokuroria Themelore në Shkup ka ngritur aktakuzë ndaj ish-drejtuesit të Shërbimit të Punëve të Përgjithshme dhe të Përbashkëta, duke e ngarkuar me vepra penale që lidhen me shpërdorimin e detyrës zyrtare dhe falsifikimin e dokumenteve. Sipas njoftimit zyrtar, bëhet fjalë për veprën e vazhdueshme të “Shpërdorimit të pozitës dhe autoritetit zyrtar” dhe “Falsifikimit të dokumentit zyrtar”, të parashikuara nga Kodi Penal.
Të lidhura
None found
Sipas hetimeve, nga data 3 korrik 2021 deri në mars të vitit 2024, i pandehuri ka tejkaluar kompetencat e tij si drejtor. Ai ka firmosur urdhëra udhëtimi për vete dhe për punonjës të tjerë, duke i justifikuar si shërbime jashtë shtetit, edhe pse këto lëvizje nuk kishin asnjë lidhje me punën. Për nevoja personale, ai ka shfrytëzuar aeroplanin qeveritar Learjet 60 dhe ka mbuluar shpenzime të ndryshme përmes llogarisë së institucionit. Gjithashtu, ka përdorur në mënyrë të pajustifikuar kartën zyrtare për shërbime hotelerie dhe ushqimi, duke i shkaktuar buxhetit një dëm që arrin shifrën 2.562.139 denarë.
Një tjetër rast i rëndë përfshin periudhën nga 27 tetori 2023 deri më 14 qershor 2024. Në këtë fazë, ish-drejtori ka dështuar të përmbushë detyrimet e tij zyrtare duke favorizuar një të tretë, konkretisht pilotin e angazhuar në këtë shërbim. Edhe pse mori pjesë në një takim të “Flight Safety Atlanta” dhe u njoh me faktin se piloti, edhe pas trajnimeve shtesë, nuk i plotësonte kriteret për të pilotuar avionin Learjet 60, ai nuk kërkoi rimbursimin e shpenzimeve të trajnimit dhe nuk njoftoi strukturat përkatëse për ndërprerjen e marrëdhënies së punës. Si pasojë, piloti vijoi të paguhej në cilësinë e kapiten-komandantit, duke shkaktuar një dëm shtesë në buxhet në vlerë prej 5.431.624 denarë.
Lidhur me akuzën për falsifikim të dokumentacionit zyrtar, ajo ka të bëjë me procedurat e prokurimit për marrjen me qira të makinave, të destinuara për transportin e delegacioneve dhe të shtetasve nga Afganistani. Kontratat janë nënshkruar gjithmonë me të njëjtën agjenci qiraje nga Shkupi. Në deklaratat për mungesën e konfliktit të interesit, i akuzuari ka paraqitur informacione të pavërteta, duke mohuar çdo përfitim privat nga ky prokurim. Megjithatë, hetimet treguan se ai dhe bashkëshortja e tij kanë përdorur pa pagesë automjete të kësaj kompanie për udhëtime brenda dhe jashtë vendit, si para, gjatë, ashtu edhe pas përmbushjes së kontratave.
Prokuroria njofton gjithashtu se ndaj pronarit të kësaj kompanie u zhvillua një hetim për veprën penale të ryshfetit. Megjithatë, pas analizimit të provave të grumbulluara, prokurori publik nuk gjeti prova se ofrimi i makinave pa pagesë kishte për qëllim sigurimin e një vendimi të favorshëm në tendera. Për rrjedhojë, u mor vendimi për mbylljen e procedurës hetimore për këtë subjekt.
