Irlanda është tronditur nga një ngjarje e rëndë në qytetin Killarney, ku një 43-vjeçare amerikane u gjet pa shenja jete në shtëpinë e saj.
Të lidhura
None found
Viktima, Jamey Carney, u zbulua në dhomën e gjumit nga vajza e saj 13-vjeçare mëngjesin e së martës, e mbuluar me një batanije. Mediat irlandeze raportuan se në trupin e saj ishin vërejtur edhe shumë plagë në kokë, por ekspertiza mjeko-ligjore përcaktoi se shkaku i vdekjes ishte mbytja nga asfiksia.
Në fillim ishte raportuar se ajo kishte ndërruar jetë si pasojë e goditjeve në kokë, por autopsia e ndryshoi këtë version, duke zbuluar se vdekja kishte ardhur nga asfiksia.
Policia irlandeze ka hapur një hetim për vrasje dhe po kërkon partnerin e saj, Ahmad Alsaqer, 28 vjeç, azilkërkues me origjinë nga Lindja e Mesme. Ai dyshohet se është larguar nga Irlanda vetëm pak orë përpara se krimi të zbulohej.
Sipas hetimeve, Alsaqer mendohet se fillimisht ka udhëtuar me autobus nga Killarney drejt Dublinit rreth orës 03:00 të mëngjesit, ndërsa më pas mund të ketë hipur në një fluturim për në Stamboll. Autoritetet irlandeze kanë shpërndarë alarme në aeroporte dhe porte dhe po bashkëpunojnë me partnerë ndërkombëtarë për ta lokalizuar. Hetuesit dyshojnë se ai mund të ketë pasur ndihmë nga kontakte në Turqi, Siri dhe Jordani.
Jamey Carney ishte transferuar nga shteti i Nju Jorkut në Irlandë në vitin 2021 bashkë me vajzën e saj. Ajo punonte në një kompani konsulence në sektorin e shëndetësisë. Sipas mediave, me Alsaqer ishte njohur rreth një vit e gjysmë më parë, gjatë një proteste pro-palestineze.
Në rrjetet sociale, sidomos në Facebook, Carney postonte shpesh foto dhe mesazhe me thirrjen “Free Palestine”, ndërsa në disa prej publikimeve shfaqej edhe me partnerin e saj.
Të afërmit e 43-vjeçares e kanë përshkruar si një grua me zemër të madhe dhe të angazhuar për kauza humanitare. Nga ana tjetër, fqinjët kanë thënë se natën para se trupi të gjendej, kishin dëgjuar një debat të fortë që vinte nga banesa e saj.
