Organizata ndërkombëtare Progressive International ka bërë publike dosjen “The Edi Rama Files”, një përmbledhje voluminoze me dokumente, vendime të institucioneve shqiptare
Të lidhura
None found
Publikimi është shpërndarë nga Sekretari i Përgjithshëm i organizatës, David Adler, i cili në një reagim në rrjetin X e përshkruan dosjen si “shpërthyese”. Sipas tij, materiali e vendos kryeministrin shqiptar në qendër të një rrjeti të gjerë të pasurive të paluajtshme, që shtrihet nga bregdeti deri në zemër të Tiranës.
Të lidhura
None found
“Vetëm javën e kaluar isha në Tiranë për të mbështetur lëvizjen e protestës së Flamingove. Këto dosje tregojnë se projekti në Zvërnec është vetëm maja e ajsbergut. Ato zbulojnë një sistem të tërë lejesh, statusesh dhe shpronësimesh, i drejtuar nga një njeri i vetëm: Edi Rama”, shkruan Adler.
Sipas autorëve, dokumenti mbështetet në vendime të Këshillit Kombëtar të Territorit (KKT), akte të qeverisë, materiale gjyqësore dhe dosje të hetimeve të SPAK-ut.
Një vëmendje e veçantë i kushtohet projektit të resortit në Zvërnec. Autorët pretendojnë se ndryshimet ligjore për zonat e mbrojtura, dhënia e statusit të Investitorit Strategjik dhe lejet e ndërtimit krijuan kushtet për realizimin e këtij projekti. Dosja sjell gjithashtu referenca për hetimin e SPAK-ut mbi përfitimin e tokës dhe dokumentet që lidhen me këtë çështje.
Materiali ndalet edhe te resorti në Palasë. Sipas autorëve, vendimi i KKT-së i vitit 2014, i firmosur nga Edi Rama, lidhet me zonën kadastrale që përmendet në hetimin e SPAK-ut. Në dosje përfshihen edhe citime nga përgjimet e publikuara në aktet hetimore, ku, sipas tyre, flitet për pagesa milionëshe për të siguruar leje ndërtimi dhe për përfshirjen e pronave në projekte turistike. Këto mbeten pretendime të paraqitura në dosje dhe nuk përbëjnë përfundime gjyqësore të formës së prerë.
Autorët e materialit thonë se statusi i “Investitorit Strategjik”, i krijuar gjatë qeverisjes së Edi Ramës, është përdorur si një mekanizëm që u ka kufizuar pronarëve mundësinë për t’i kundërshtuar në gjykatë projektet e mëdha të zhvillimit.
Dosja e Progressive International i kërkon komunitetit ndërkombëtar të tregojë më shumë vëmendje ndaj zhvillimeve në Shqipëri. Në të, protestat e nisura për projektin e Zvërnecit përshkruhen si një reagim qytetar ndaj mënyrës së qeverisjes së vendit.
STATUSI I PLOTE I DAVID ADLER
Sot, @ProgIntl publikon “Dosjet Edi Rama” (Edi Rama Files) 🚨, një dosje shpërthyese që e vendos kryeministrin shqiptar, Edi Rama, në krye të një perandorie të paligjshme të pasurive të paluajtshme, që shtrihet nga bregdeti i vendit deri në kryeqytet.
Vetëm javën e kaluar isha në Tiranë për të mbështetur lëvizjen e protestës së “Flamingove”: shqiptarët që janë ngritur kundër planit miliardë dollarësh të familjes Trump për privatizimin e ligatinave të tyre të mbrojtura.
Këto dosje tregojnë se ky projekt është vetëm maja e ajsbergut — një sistem i gjerë lejesh, statusesh dhe shpronësimesh, i drejtuar nga një njeri i vetëm: Edi Rama, i preferuari i Bashkimit Evropian.
Dosjet ofrojnë një pamje të detajuar hetimore mbi ekonominë politike të kleptokracisë në pragun e Evropës — dhe është hera e parë që këto dokumente publikohen dhe i prezantohen një audience ndërkombëtare.
Prandaj, hidhuni një sy — shpërndajeni lajmin — dhe qëndroni në krah të popullit shqiptar, i cili del në rrugë ditë pas dite për të tërhequr vëmendjen e botës ndaj asaj që autori e përshkruan si grushti i heshtur, por vdekjeprurës, i Edi Ramës kundër vendit të tij.
