Barcelona synon që javën e ardhshme të mbyllë marrëveshjen për transferimin përfundimtar të mbrojtësit uruguaian Patricio Pacifico nga Defensor Sporting, sipas asaj që raporton Mundo Deportivo.
Futbollisti 20-vjeçar, i cili luan në qendër të mbrojtjes, ka lënë sinjale shumë pozitive gjatë huazimit te Barca Atletic dhe ka bindur drejtuesit e klubit katalunas pas vetëm shtatë ndeshjeve me ekipin rezervë.
Të lidhura
None found
Ndonëse ecuria e tij u ndal përkohësisht për shkak të një dëmtimi serioz në gju, te Barcelona vazhdojnë të jenë plotësisht të bindur për vlerën dhe potencialin afatgjatë të lojtarit uruguaian.
Me marrëveshjen e re të ristrukturuar, Pacifico pritet të vazhdojë zhvillimin në Spanjë, duke qëndruar edhe një sezon tjetër në huazim te skuadra e dytë e klubit.
Në këtë marrëveshje përfshihet edhe një kusht i rëndësishëm. Në rast se lojtari zhvillon edhe tri ndeshje të tjera dhe e çon në dhjetë numrin total të paraqitjeve, Barcelona do të aktivizojë zyrtarisht klauzolën e detyrueshme për blerjen përfundimtare të kartonit të tij.
Klubi katalunas e sheh Pacificon si një projekt me perspektivë të madhe për të ardhmen dhe beson se ai mund të bëhet një element i rëndësishëm i repartit mbrojtës në vitet që vijnë.
